ރާއްޖޭގައި އެންމެ ބުރަ ޒިންމާއެއް އަދާ ކުރާ ބަޔަކީ ޓީޗަރުން ކަން ފާހަގަކުރައްވައި ރައީސް ވިދާޅުވީ ޓީޗަރުންނަށް މިއަދާ ހަމައަށް ވެސް ލިބެނީ އެކަށީގެންވާ އުޖޫރައަށް ވުރެ ކުޑަ އުޖޫރައެއް ކަމަށެވެ. އަދި މުސާރައަށް ގެނައި ބަދަލަކީ މުވައްޒަފުން ބަލައިގަންނާނެ ބަދަލަކަށް ވާނޭ ކަމަށް އުންމީދު ކުރައްވާ ކަމަށެވެ.
ރައީސް ވިދާޅުވީ މި ސަރުކާރުން ތައުލީމީ ދާއިރާއަށް ބޮޑު ސަމާލުކަމެއް ދެނީ ވިސްނުން ތޫނު، އިލްމީ، ހެޔޮ ލަފާ ޖީލެއް ބިނާ ކުރުމަށް ކަމަށެވެ. މި ކަމުގައި ޓީޗަރުންނާއި އެ ދާއިރާގެ އެންމެހާ މުވައްޒަފުންގެ އަގު ސަރުކާރުން ވަޒަން ކުރާ ކަމަށް ރައީސް ވިދާޅުވިއެވެ.
އެމަނިކުފާނު ވިދާޅުވި ގޮތުގައި ރާއްޖޭގައި އިންސާނީ ވަސީލަތް ބިނާ ކުރުމަށް އެންމެ ބުރައެއް އުފުލަނީ ޓީޗަރުންނެވެ. ޓީޗަރުންގެ މުސާރަ އަށް ގެނައި ބަދަލަކީ ގައުމު ބިނާ ކުރުމަށް ގެނައި ބަދަލެއް ކަމަށް ވިދާޅުވިއެވެ.
