މަޖިލީހުގެ 241 ކޮމިޓީއަށް މި މައްސަލަ ހުށަހެޅުއްވީ މަޖިލީހުގެ ގުރައިދޫ ދާއިރާގެ މެމްބަރު މުހައްމަދު ގައްސާން މައުމޫން އެވެ.
ރައްޔިތުންގެ މަޖިލީހުގެ ރައީސް، މުހައްމަދު ނަޝީދުއަށް ގައްސާން ފޮނުއްވި ސިޓީގައި ވިދާޅުވެފައި ވަނީ، "މޯލްޑިވްސް ޔޫތް ފޯސް" ގެ ނަމުގައި ހަދާފައިވާ ޓުވިޓާ އެކައުންޓަކުން ރައީސް ޔާމީންގެ ހަށިކޮޅަށް ގެއްލުންދޭނެ ކަމަށްބުނެ ވީޑިއޯއެއް އާއްމުކޮށް އިންޒާރު ދީފައި ވާކަމަށެވެ.
މީގެ އިތުރުން ގައްސާން ފޮނުވި ސިޓީގައި ބުނެފައިވަނީ، ގާނޫނުއަސާސީގެ 148 ވަނަ މާއްދާގެ ދަށުން ރައީސް ޔާމީންއަށް ރައްކާތެރިކަން ފޯރުކޮށް ދެއްވުމަކީ، ދިވެހި ސަލާމަތީ ހިދުމަތްތަކުގެ މައްޗަށް ލާޒިމްވެގެންވާ ކަމެއް ކަމަށެވެ. އެ ވީޑިއޯގެ މައްސަލަ ފުލުހަށް ހުށަހަޅާފައިވާ ކަމަށާއި، ނަމަވެސް މައްސަލަ ބަލަން ފެށި ކަމުގެ އެއްވެސް އިޝާރާތެއް ލިބިފައި ނުވާ ކަމަށް އެ ސިޓީގައި ގައްސާން ވަނީ ބުނެފައެވެ.
އެ މައްސަލަ 241 ކޮމިޓީން ބަލައިދިނުމަށާއި، އެ މައްސަލައިގައި ސަލާމަތީ ހިދުމަތްތަކުން އަމަލުކޮށްފައިވާ ގޮތް ބަލައި ދިނުމަށް ވެސް އެ ސިޓީގައި އެދިފައި ވެއެވެ.
ގައްސާން މިފަދައިން ވިދާޅުވެފައި ވާއިރު، "މޯލްޑިވްސް ޔޫތު ފޯސް" އަށް ނިސްބަތްވާ ބައެއް ފަރާތްތަކުން ވަނީ އިއްޔެ ހަވީރު ރައީސް ޔާމީން ދިރިއުޅުއްވަމުން ގެންދަވާ ގެކޮޅު ކައިރިއަށް އައިސް އަޑުގަދަކޮށްފައެވެ.
"މޯލްޑިވްސް ޔޫތު ފޯސް" އިން ރައީސް ޔާމީނަށް އިންޒާރުދިނުމަށް އާންމުކުރި ވީޑިއޯގައި ބުނެފައިވަނީ މި ގައުމުގައި ކުރިން ވެރިކަން ކުރި މީހަކު އަނެއްކާވެސް މި ގައުމު އިނދަ ޖައްސާލަން މަސައްކަތް ކުރާ ކަމަށެވެ.
