މީގެ ކުރިން ޓީޗަރުންނަށް އެޓެންޑަންސް އެލަވަންސް ދީފައި ނުވިނަމަވެސް މި މަހުގެ އެއް ވަނަ ދުވަހު ރައީސް އިބްރާހިމް މުހައްމަދު ސޯލިހު އިއުލާން ކުރެއްވި އާ އޮނިގަނޑުގެ ދަށުން ދެން ޓީޗަރުންނަށް އެ އެލަވަންސް ލިބޭނެއެވެ.
އެގޮތުން މުސާރައިގެ އާ އޮނިގަނޑުގެ ތަފްސީލުގައި ވާގޮތުން ޓީޗަރުން ވަޒީފާއަށް ނިކުންނަ ކޮންމެ ދުވަހަކު އެޓެންޑަންސް އެލަވަންސް ދިނުމަށް ވަނީ ހަމަޖެހިފައެވެ.
މިއާއި އެކު ރޭންކު އެކެއްގެ ޓީޗަރަކަށް އެލަވަންސްގެ ގޮތުގައި މަހަކު 1،659 ރުފިޔާ ލިބޭ އިރު، ރޭންކު ދޭއްގެ ޓީޗަރަކަށް މަހަކު އެލަވަންސްގެ ގޮތުގައި 3،212 ރުފިޔާ ލިބޭނެއެވެ.
ރޭންކު ތިނެއްގެ ޓީޗަރަކަށް މަހަކު 3،454 ރުފިޔާ އަދި ރޭންކު ހަތަރެއްގެ ޓީޗަރަކަށް މަހަކު 3،850 ރުފިޔާ ލިބޭނެ އެވެ. މީގެ އިތުރުން ރޭންކު ފަހެއްގެ ޓީޗަރަކަށް މަހަކު 4،290 ރުފިޔާ ލިބޭނެ ކަމަށްވެސް އާ އޮނިގަނޑުގެ ތަފްސީލުގައި ވަނީ ބުނެފައެވެ.
އެހެން ނަމަވެސް މިވަގުތު އަދި ރާއްޖެއަކު ރޭންކު ހަތަރެއް އަދި ފަހެއްގެ ޓީޗަރަކު ނެތެވެ. އެ ރޭންކްއަށް ޓީޗަރުން ހަމަޖެއްސުމަށް ހަމަޖެހިފައި ވަނީ، އަލަށް އަމަލުކުރާ އޮނިގަނޑުގެ ދަށުންނެވެ.
ޓީޗަރުންގެ ރޭންކުތައް
- ރޭންކް 1: ޑިޕްލޮމާ ހާސިލްކޮށްފައިވުން
- ރޭންކް 2: ޑިގްރީ ހާސިލްކޮށްފައިވުން
- ރޭންކް 3: ޑިގްރީއާ އެކު މާސްޓާސް ޑިގްރީ ހާސިލްކޮށްފައިވުން
- ރޭންކް 4: ޑިގްރީއާ އެކު މާސްޓާސް ހާސިލްކޮށްފައިވުން އަދި ރޭންކް 3 ގެ މަގާމުގައި ހަ އަހަރު މަސައްކަތްކޮށްފައިވުން
- ރޭންކް 5: ޑިގްރީއާ އެކު މާސްޓާސް ހާސިލްކޮށްފައިވުން އަދި ރޭންކް 4 ގެ މަގާމުގައި ހަ އަހަރު މަސައްކަތްކޮށްފައިވުން
ޓީޗަރުންގެ އާ މުސާރައިގެ އޮނިގަނޑާއި އެކު ރާއްޖޭގައި ތައުލީމީ ދާއިރާގައި މަސައްކަތް ކުރަމުން އަންނަ 8000 އަށްވުރެ ގިނަ ފަރާތްތަކުގެ މުސާރައަށް ވަނީ ހެޔޮ ބަދަލުތަކެއް އައިސްފައެވެ.
އެގޮތުން އެންމެ މަދުން މުސާރަ ލިބޭ ޓީޗަރަކަށްވެސް މިހާރު މުސާރައިގެ ގޮތުގައި މަހަކު، 13،000 އަށްވުރެ ގިނަ ރުފިޔާ ލިބޭނެ އެވެ.
