ވ.އަތޮޅުކައުންސިލުން މީގެ ކުރިން އެރަށާ ބެހޭ ގޮތުން ގަރާރެއް ނެރެފައިވާއިރު މިއަދު އެކައުންސިލުންވަނީ އެރަށަށް ގޮސް އެރަށުގެ ހާލަތު ބަލާފައެވެ.
މިދަތުރުގައި “ސީއެންއެމް”ގެ ޓީމްވެސް ބައިވެރިވެފައިވާއިރު އެކައުންސިލުން ވަނީ އެރަށުގައި ދަނޑުވެރިކަމުގެ އެއްވެސް މަސައްކަތެއް ކޮށްފައި ނުވާކަން ނޫސްވެރިންނަށް ދައްކާލައިފައެވެ.
އެރަށުގައި ދަނޑުވެރިކަމުގެ މަސައްކަތެއް ކޮށްފައި ނުވާއިރު އެރަށަށް ބޮޑެތި ގެއްލުން ތަކެއް ދީފައިވާކަންވެސް ކައުންސިލުން ފާހަގަ ކުރެއެވެ.
ވ.އަތޮޅު ކައުންސިލް ރައީސް ސުޖާއު އަލީ ވިދާޅުވީ އެރަށް ތަރައްގީ ކުރުމަށް ދީފައިވާ މުއްދަތު ހަމަވެފައިވާއިރު، އެރަށުގައި ކުރަން އެގްރީމެންޓްގައި ބުނެފައިވާ އެއްވެސް ކަމެއް ކޮށްފައި ނުވާ ކަމަށާއި، އޭގެ ބަދަލުގައި ރަށަށް ގެއްލުން ތަކެއް ދީފައިވާ ކަމަށެވެ.
މިއަދު އެރަށުން ސީއެންއެމްއަށް ދައްކާލާފައިވާ ތަންތަނުގެ ތެރެއިން ރާއްޖޭގައި ނެތެމުންދާ ކަނޑު ފަލެއް ވަނީ ދައްކާލައިފައެވެ. އަކުންސިލުން ބުނީ އެތަނަށް ފަސްއަޅާފައިވަނީ އެރަށުގައި މަސައްކަތް ކުރާ މީހުން ކަމަށެވެ. އޭގެ އިތުރުން ވެލި ނަގަން ގެންގުޅޭ ބަނޑެއް އެރަށަށް ވަނީ ބީއްސާލާފައެވެ. އަދި އެރަށުގެ ޖެޓީވެސް ހަދާފައިވަނީ އީއައިއޭ ރިޕޯޓާ ހިލާފަށް ކަމަށް އަތޮޅު ކައުންސިލުން ބުނެއެވެ.
