މާލެ ސިޓީ ކައުންސިލްގެ 51 ވަނަ އާއްމު ޖަލްސާގައި ވާހަކަފުޅު ދައްކަވަމުން ނަރީޝް ވިދާޅުވީ، ސަރުކާރުން އެ ކައުންސިލާއި ދޭތެރޭ އަމަލު ކުރަމުން އަންނަނީ ވަރަށް އިހާނެތިކޮށް ކަމަށާއި، ސަރުކާރުން އެ ކައުންސިލުން ކުރިއަށް ގެންދަން ބޭނުންވާ ކަންކަމަށް ހުރަސްތައް ކުރިމަތި ކުރުވަމުން އަންނަ ކަމަށެވެ.
އެގޮތުން މިހާރުވެސް ކައުންސިލުން ދެމުން އަންނަ ހިދުމަތްތައް އިތުރަށް ހަރުދަނާ ކުރުމަށް ބޭނުންވާ 100 މުވައްޒަފުން ނުހޯދި ތިބީ ސަރުކާރުން އެކަމަށް ދޭންޖެހޭ ހުއްދަ ނުދީގެން ކަމަށާއި، ރާއްޖޭގެ އާބާދީގެ ތިންބައިކުޅަ ދެބައި މީހުން ދިރިއުޅޭ މާލޭގެ ރައްޔިތުންނަށް ހިދުމަތް ދިނުމުގައި މިކަންކަމުގެ ސަބަބުން ދަތިތަކެއް ދިމާވާ ކަމަށެވެ.
މީގެ އިތުރުން ނަރީޝް ވިދާޅުވީ، ސިޓީ ކައުންސިލްގައި މަސައްކަތް ކުރާ މުވައްޒަފުންގެ މުސާރަވެސް ބޮޑުކުރަން ޖެހޭ ކަމަށާއި، ކައުންސިލްގެ މުވައްޒަފުން ކުރަމުން ގެންދަނީ ބުރަ މަސައްކަތެއް ކަމަށެވެ.
އެހެން މުވައްސަސާތަކުގެ މުސާރަ ބޮޑުވާގޮތަށް ކައުންސިލްގެ މުވައްޒަފުންގެ މުސާރަވެސް ބޮޑުވާން ޖެހޭ ކަމަށްވެސް ނަރީޝަ ވަނީ ވިދާޅުވެފައެވެ. އަދި ނަރީޝް ވަނީ ކައުންސިލްގެ މުވައްޒަފުންގެ މުސާރަ ބޮޑުކޮށްދޭން ފިނޭންސް މިނިސްޓްރީއަށް ފޮނުވުމަށް ހުށަހަޅާފައެވެ. ނަރީޝްގެ ހުށަހެޅުއްވުމަށް ވިލިމާލޭ ދާއިރާގެ މެމްބަރު ނަހުލާ އަލީ ވަނީ ތާއީދު ކުރައްވާފައެވެ.
