އެމްއެންޑީއެފުން މީޑިއާތަކާ ހިއްސާކުރި މަޢުލޫމާތުގައި ބުނެފައިވަނީ އަންޑަވޯޓަރ ސާރޗްގެ ގޮތުގައި 64240 އަކަމީޓަރު އަދި ވައިގެ މަގުން 1545 ސްކުއެއާ މޭލް (4000 ކިލޯ އަކަމީޓަރު) ބަލާފައިވާ ކަމަށެވެ. ނަމަވެސް މިހާތަނަށް އުމުރުން 25 އަހަރުގެ މުޝްފިގް ފެނިފައެއް ނުވެއެވެ.
ހޮޅުދޫ ބޯޓުގައި އަލިފާން ރޯވެފައިވަނީ ތ.ހިރިލަންދޫން ފުރައިގެން ދަނިކޮށް ރޭ 21:07 ހާއިރުއެވެ. އެމްއެންޑީއެފުން ބުނިގޮތުގައި މި ބޯޓުގައި ދަތުރުކުރަމުން ދިޔައީ ކެޕްޓަންއާއެކު 18 މީހުންނެވެ. އޭގެ ތެރެއިން 17 މީހުން ސަލާމަތްކުރެވިފައިވާއިރު، މިހާތަނަށް ނުފެނިވަނީ މުޝްފިގް މުހައްމަދު ޝަރީފެވެ. އަލިފާން ރޯވި ބޯޓު ރޭ ދަންވަރު 02:07 ހާއިރު މުޅިން އަޑިއަށް ގޮސްފައިވާ ކަމަށް އެމްއެންޑީއެފުން މަޢުލޫމާތު ދީފައިވެއެވެ.
މުޝްފިގް ހޯދުމުގެ މަސައްކަތް ކޯސްޓްގާޑްގެ ތިން އުޅަނދެއްގެ އިތުރުން ޑައިވަރުންނާއި އެއާ ކޯގެ ޑްރޯން އަދި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ގުޅިގެން ދަނީ ކުރަމުންނެވެ. ހޮޅުދޫ ބޯޓުގައި އަލިފާން ރޯވިކަމުގެ މަޢުލޫމާތު ލިބުމާއެކު އެމްއެންޑީއެފް ސެންޓްރަލް އޭރިއާ ކޮމާންޑް ކޯސްޓްގާޑުން، ބޯޓު އޮތް ސަރަހައްދަށް ގޮސް އަލިފާން ނިއްވުމުގައި ވަގުތުން ހަރަކާތްތެރިވެފައިވާ ކަމަށް އެމްއެންޑީއެފުން ބުނެފައިވެއެވެ.
