މިކަމާއި ގުޅިގެން އެޕާޓީގެ އިންތިހާބާ ބެހޭ ކޮމިޓީގެ މުގައްރިރު އިބްރާހިމް މަނިކު ވިދާޅުވީ، އިންތިހާބާއި ގުޅޭގޮތުން ހުށަހެޅި ޝަކުވާތައް ބަލާ ނިމިފައި ވާކަމަށާއި، އިންތިހާބުގައި ދެ ކެނޑިޑޭޓުންގެ ފަރާތުންވެސް ޝަކުވާތައް ލިބިފައި ވާކަމަށެވެ. އެހެން ނަމަވެސް އެއް ވެސް ކެނޑިޑޭޓަކު ހުށަހެޅި ޝަކުވާތަކުގައި އިންތިހާބަށް ބަދަލު އަންނަ ނުވަތަ އަސަރު ކުރާ ޝަކުވާއެއް ނެތް ކަމަށް މަނިކު ވިދާޅުވި އެވެ.
މީގެ އިތުރުން އިންތިހާބުގެ ހުރިހާ ކަމެއް ދިޔައީ ޖުމްލަ ގޮތެއްގައި ވަރަށް ރަނގަޅަށް ކަމަށްވެސް މަނިކު ވިދާޅުވި އެވެ.
އެ ޕާޓީގެ ޗެއާޕާސަން ހޮވުމަށް ބޭއްވި އިންތިހާބު ތަފާތު ބޮޑުކޮށް ކާމިޔާބު ކުރީ، ފައްޔާޒް އިސްމާއީލް އެވެ. އިންތިހާބު ކުރިއަށް ދިޔަ ދުވަހު ދެން މި އިންތިހާބުގައި ވާދަ ކުރެއްވި އިމްތިޔާޒް ފަހުމީގެ ފަރާތުން ވަނީ ގިނަ ޝަކުވާތަކެއް ހުށަހަޅާފައެވެ.
އެގޮތުން ވޯޓު ފޮށިތަކަށް ގަނޑުކޮށް ވޯޓު އަޅާފައިވާ މައްސަލައާއި، ވޯޓު ފޮށިތައް ބަންދުކުރުން ފަސްކުރި މައްސަލަ އެ ފަރާތްތަކުން ވަނީ ހުށަހަޅާފައެވެ.
އެހެން ނަމަވެސް ވޯޓު ފޮށިތައް ބަންދުކުރާ ވަގުތު އިތުރު ކުރީ، ދެ ކެނޑިޑޭޓުންގެ މަންދޫބުންނާއި މަޝްވަރާކުރުމަށް ފަހު ކަމަށް އެމްޑީޕީއިން ވަނީ ބުނެފައެވެ.
