ވާދަވެރި މި އިންތިހާބުގައި އެމްޑީޕީގެ ޗެއާޕާސަން ކަމަށް ވާދަކުރެއްވީ، އިކޮނޮމިކް މިނިސްޓަރު ފައްޔާޒް އިސްމާއީލް އާއި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ އެވެ. ފޯރިގަދަ މި އިންތިހާބު ބޮޑު ތަފާތަކުން ކާމިޔާބުކޮށް އެ ޕާޓީގެ ޗެއާޕާސަން ކަމަށް އިންތިހާބުވީ ފައްޔާޒް އިސްމާއީލް އެވެ.
މީގެ އިތުރުން އެޕާޓީގެ އަންހެނުންގެ ރޫހުގެ ރައީސާ ކަމުގެ މަގާމަށް އިންތިހާބު ވެވަޑައިގެންނެވީ، ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އެވެ. ރޮޒެއިނާ މި މަގާމަށް އިންތިހާބުވެވަޑައިގަތީ، ސަފާތު އަހްމަދު ޒާހިރުއާ ވާދަކޮށެވެ. އަދި އެ ޕާޓީގެ ޒުވާނުންގެ ހިތްވަރުގެ ރައީސް ކަމުގެ މަގާމަށް އިންތިހާބުވެފައި ވަނީ، ރިފްގާ ޝިޔާމް އެވެ. އޭނާ މި މަގާމަށް އިންތިހާބުވީ، މުހައްމަދު އަންސަރު އާއި ވާދަކޮށެވެ.
އެމްޑީޕީގެ އެތެރޭގެ އިންތިހާބުގެ ވަގުތީ ނަތީޖާ:
އެމްޑީޕީގެ ޗެއާޕާސަން:
- ފައްޔާޒް އިސްމާއީލް: 57 އިންސައްތަ (27،470 ވޯޓު)
- އިމްތިޔާޒް ފަހުމީ: 41 އިންސައްތަ (20،051 ވޯޓު)
- ވޯޓުލީ މީހުންގެ ޖުމްލަ އަދަދު: 48،502
- ސައްހަ ވޯޓު: 47،521
- ބާތިލް ވޯޓު: 981
އެމްޑީޕީގެ އަންހެނުންގެ ރޫހުގެ ރައީސް:
- ރޮޒައިނާ އާދަމް: 56 އިންސައްތަ (11،708 ވޯޓު)
- ސަފާތު އަހްމަދު ޒާހިރު: 38 އިންސައްތަ (7961 ވޯޓު)
- ވޯޓުލީ މީހުންގެ ޖުމްލަ އަދަދު: 20،856
- ސައްހަ ވޯޓު: 19،669
- ބާތިލް ވޯޓު: 1187
އެމްޑީޕީގެ ޒުވާނުންގެ ހިތްވަރުގެ ރައީސް
- ރިފްގާ ޝިޔާމް: 48 އިންސައްތަ (6،322 ވޯޓު)
- މުހައްމަދު އަންސަރު: 42 އިންސައްތަ (5،545 ވޯޓު)
- ވޯޓުލީ މީހުންގެ ޖުމްލަ އަދަދު: 13،126
- ސައްހަ ވޯޓު: 11،867
- ބާތިލް ވޯޓު: 1259
މި އިންތިހާބުގައި އިމްތިޔާޒް ފަހުމީގެ ޓީމުން ވަނީ ގިނަ ޝަކުވާތަކެއް ހުށަހަޅާފަ އެވެ. އެހެން ނަމަވެސް އެ ޕާޓީއިން އެ ފަރާތުން ހުށަހެޅި ޝަކުވާތައް ބެލުމަށްފަހު އިންތިހާބަށް އަސަރު ކުރުވާ ވަރުގެ އެއްވެސް ޝަކުވާއެއް ނެތް ކަމަށް ވަނީ ނިންމާފަ އެވެ.
އެމްޑީޕީއިން މައުލޫމާތު ދޭ ގޮތުގައި، އެ ޕާޓީގެ އެތެރޭގެ އިންތިހާބުގެ ވަގުތީ ނަތީޖާ އިއުލާން ކުރާތާ ހަތް ދުވަސްތެރޭ އެ ޕާޓީގެ މަގާމުތަކަށް އިންތިހާބުވި ފަރާތްތައް މަގާމުތަކާއި ހަވާލުވާނެ އެވެ.
