މިއަދު ސީއެންއެމްއަށް ދެއްވި އިންޓަރވިއުއެއްގައި މާލޭގެ މަގުތަކުގެ މައްސަލަ އާއި ގުޅޭގޮތުން ވާހަކަފުޅު ދައްކަވަމުން އާރުޑީސީގެ މެނޭޖިން ޑިރެކްޓާ މޫސާ އަލީ މަނިކު (މޫކޭ) ވިދާޅުވީ މާލޭގެ މަގުތައް މަރާމާތުކުރުމުގެ މައްސަލަ މިހާރުވެސް ލަސްވެފައިވާ ކަމަށެވެ.
މޫކޭ ވިދާޅުވީ މާލޭގެ މަގުތައް ޒަމާނީ ފެންވަރަށް ތަރައްގިކުރުމުގެ ވިސްނުން އާރުޑީސީން އަބަދުވެސް ގެންގުޅުއްވާ ކަމަށާއި ނަމަވެސް ބައެއްކަހަލަ ގޮންޖެހުންތައް ހުރުމުގެ ސަބަބުން މަސައްކަތް ނުފެށި ލަސްވެފައިވާ ކަމަށެވެ.
މޫކޭ ވިދާޅުވީ މާލޭގެ 15 މަގެއް ޒަމާނާއި އެއްގޮތަށް ތަރައްގީކުރުމުގެ އެއްބަސްވުމެއް މާލޭ ސިޓީ ކައުންސިލާއެކު މީގެ ކުރިންވެސް ވެފައިވާ ކަމަށާއި، ނަމަވެސް ކައުންސިލް ބަދަލުވުމާއެކު ފައިސާގެ ބައެއް މައްސަލަތައް ދިމާވުމުން މަސައްކަތް އޭރު ހުއްޓާލެއްވީ ކަމަށެވެ.
މޫކޭ ވިދާޅުވި މިހާރުގެ ސިޓީ ކައުްނސިލާއެކު އަލުން މާލޭގެ މަގުތަކުގައި ތާރު އަޅައި ޒަމާނީ ތަރައްގީ ގެނައުމަށް އެއްބަސްވެފައިވާ ކަމަށާއި، ސިޓީ ކައުްނސިލުން ނިންމަންޖެހޭ ކަންކަން ނިމިމާއެކު ލަސް ނުކޮށް މި މަސައްކަތް ފަށާނެ ކަމުގަ އެވެ.
އާރުޑީސީން ވަނީ މާލޭގެ ޖުމްލަ 15 މަގެއްގައި ތާރު އެޅުމަށް ނިންމާފަ އެވެ. އެ މަގުތަކަކީ އަމީނީ މަގު، ޗާންދަނީ މަގު، ކަނބާ އައިސާ ރަނި ހިނގުން، ޝަހީދު ޢަލީ ހިނގުން، ޢިއްޒުދީން މަގު، ހަނދުވަރީ ހިނގުން، މުރަނގަ މަގު، ހަވީރީ ހިނގުން، މާވެޔޮ މަގު، މުއިވެޔޮ މަގު، ރައްދެބައި ހިނގުން، ލިލީ މަގު، އަލިކިލެގެފާނު މަގު، ލޮނުޒިޔާރަތް މަގު އަދި ސޯސަން މަގެވެ.
