ރިޔާޒް މިފަދައިން ވިދާޅުވެފައި މިވަނީ، ސިޔާސީ ޕާޓީތަކަށް އޮޅުވައިލައިގެން މީހުން ވައްދާ މައްސަލަ އާއި ގުޅިގެން މަޖިލީހުގެ ތަޅުމަށް މަޑުއްވަރީ ދާއިރާގެ މެމްބަރު އާދަމް ޝަރީފް މިއަދު ހުށަހެޅުއްވި މައްސަލަ ބޭރުކޮށްލުމުން، ކުރެއްވި ޓުވީޓެއްގަ އެވެ. 

ރިޔާޒްގެ ޓުވީޓްގައި ބުނެފައިވަނީ، ސިޔާސީ ޕާޓީތަކުން އީސީ އަށް ވަގު ފޯމު ހުށަހަޅަނީ، ދައުލަތުން ކޮންމެ އަހަރަކު ސިޔާސީ ޕާޓީތަކަށް ފައިސާ ދެމުން އައުމުން ކަމަށާއި، އެހެން ކަމުން އެކަން ނިމުމަކަށް ގެންނަ ޖެހޭނެ ކަމަށެވެ.

ސިޔާސީ ޕާޓީތަކުގެ ގާނޫނުގައި ބުނެފައި ވާގޮތުގައި، ކޮންމެ އަހަރެއްގެ ދައުލަތުގެ ބަޖެޓުން ސިޔާސީ ޕާޓީތަކަށް 0.1 އިންސައްތަ ދޭން ޖެހޭ ކަމަށެވެ. 

އަދި މިފައިސާ ލިބޭނީ މަދުވެގެން 10،000 މެމްބަރުން ތިބޭ ޕާޓީތަކަށް ކަމަށް އެގާނޫނުގައި ވަނީ ބުނެފަ އެވެ. 

ދައުލަތުގެ ބަޖެޓުން މި އަހަރު އެކަނި ވެސް 30.2 މިލިއަން ރުފިޔާ ސިޔާސީ ޕާޓީތަކަށް ވަނީ ދޫކޮށްފަ އެވެ. އެގޮތުން އެމްޑީޕީ އަށް 15.02 މިލިއަން ރުފިޔާ ދޫކޮށްފައި ވާއިރު، ޕީޕީއެމް އަށް 9.4 މިލިއަން ރުފިޔާ ވަނީ ދޫކޮށްފަ އެވެ. 

ޖޭޕީއަށް 5.53 މިލިއަން ރުފިޔާ ދޫކޮށްފައި ވާއިރު، އަދާލަތު ޕާޓީއަށް މި އަހަރުގެ ބަޖެޓުން 2.9 މިލިއަން ރުފިޔާ ސަރުކާރުން ވަނީ ދޫކޮށްފަ އެވެ.