ފިޝަރީޒް މިނިސްޓްރީން ދިން ބިމުގައި އެ ކުންފުނިން ކޯލްޑްސްޓޯރޭޖް ހަދަން ފަށާފައިވަނީ ރައީސް މައުމޫނުގެ ވެރިކަމުގައި 2005 ވަނަ އަހަރުގެ ތެރޭގައެވެ. އެ ބިމަކީ 13 ހެކްޓަރުގެ ބިމެކެވެ. ބިން ކުއްޔަށް ދީފައިވަނީ 35 އަހަރަށެވެ.
ބޮޑު ބިޔަ ބިމުގެ ކުލީގެ ގޮތުގައި މަހެއްގެ މައްޗަށް ދައްކަން ޖެހެނީ އެންމެ 18،083 (އަށާރަ ހާސް އަށްޑިހަ ތިން) ރުފިޔާ އެވެ. ނަމަވެސް 16 އަހަރު ހޭދަވީއުރުވެސް، އެ މަސައްކަތް ނުނިމި އޮތުމަކީ އެ އަތޮޅުގެ މަސްވެރިންނަށް ދިމާވެފައިވާ ވަރަށް ބޮޑު "ތަކުލީފެއް އަދި ބޭ އިންސާފެއް" ކަމަށް އެ ކައުންސިލުގެ ގަރާރުގައި ވަނީ ބުނެފައެވެ.
ގދ އަތޮޅު ކައުންސިލުން މި ހަފްތާތެރެގައި ނެރުނު ގަރާރެއްގައި ބުނެފައިވަނީ ހޯޑެއްދޫގައި ހުންނަ ހުވަދޫ ފިޝަރީޒް ކޮމްޕްލެކްސްގެ ބޮޑުބައެއް ނިމިފައިވާކަމަށެވެ. ނަމަވެސް ކޯލްޑް ސްޓޯރޭޖް ނިމިފައި ނެތުމުން ހޮރައިޒަން ފިޝަރީޒް އަށް ދީފައިވާ ބިން އަތުލުމަށް ސަރުކާރުން ކުރާ މަސައްކަތް އަވަސްކޮށްދިނުމަށް ވެސް އެ އަތޮޅު ކައުންސިލުން ވަނީ ގޮވަލާފައެވެ.
ކައުންސިލުން ވަނީ ބިމުގެ ރެޖިސްޓްރީ ވެސް ކައުންސިލުގެ މައްޗަށް ބަދަލުކޮށްދިނުމަށް ސަރުކާރަށް ގޮވާލާފައެވެ.
މި މައްސަލައިގައި މިދިޔަ މަހުގެ ތެރޭގައި އެއަތޮޅު މަސްވެރިން ވެސް ވަނީ މުޒާހަރާ ކޮށްފައެވެ.
