ރާއްޖޭގެ އިދާރީ ދާއިރާތައް ލާމަރުކަޒީ ނިޒާމުން ހިންގުމަށް މީގެ ކުރިން އަމަލުކުރަންދަނީ ލާމަރުކަޒީ ނިޒާމުގެ ތެރެއިން ކައުންސިލްތަކުން އަމިއްލައަށް ލޭންޑްޔޫސް ޕްލޭންތައް އެކުލަވާލުމެވެ.
އެހެންނަމަ ވެސް މި ޕްލޭންތައް ކައުންސިލްތަކުން ޕަލޭނިންގ މިނިސްޓްރީއަށް ހުށައަޅައިގެން ފާސްކުރަންޖެހެ އެވެ.
ލާމަރުކަޒީ ގާނޫނު ބުނާގޮތުން ކައުންސިލްތަކުން ޕްލޭންތައް މިނިސްޓްރީއަށް ހުށަހެޅުމުން ފާސްނުވެ ބޮޑެތި އުދަގޫތައް ކުރިމަތިވަމުންދާކަމަށް ކައުންސިލްތަކުންނާއި، މިނިސްޓްރީން ވެސް އަންނަނީ ބުނަމުންނެވެ.
އއ އުކުޅަހުގައި މިއަދު ފެށި "ވިއަވަތި ރާއްޖެ" ކޮންފަރެންސްގައި ލޭންޑް ޔޫސް ޕްލޭން ހެދުމާ ގުޅޭ ސެޝަނެއް ވަނީ ބާއްވާފަ އެވެ. އެ ސެޝަންގައި ވާހަކަ ދައްކަވަމުން ރައީސް ސޯލިހު ވިދާޅުވީ, އެ ޕްލޭންތައް އެކުލަވާލުމުގައި ހުރީ ގާނޫނީ ގޮތުން ހުރި ގޮންޖެހުންތަކެއް ކަމަށޭވެ. ރައީސް ވިދާޅުވީ ލާމަރުކަޒީ ގާނޫނަށް ބަދަލުތަކެއް ގެނެސް ލޭންޑް ޔޫސް ޕްލޭން އެކުލަވާލުމަށް ގާނޫނެއް އެކުލަވާލަންޖެހޭކަމަށާއި، އެކަމަށް މަސައްކަތްކުރައްވާނެ ކަމަށެވެ.
މިހާތަނަށް 55 ރަށެއްގެ ލޭންޑް ޔޫސް ޕްލޭން ހެދުމަށް ހުށަހަޅާފައިވެ އެވެ. ނަމަވެސް އޭގެތެރެއިން ފާސްވެފައިވަނީ ޖުމްލަ 7 ރަށެއްގެ ލޭންޑް ޔޫސް ޕްލޭނެކެވެ.
"ވިޔަވަތި ރާއްޖެ" ކޮންފަރެންސްގައި މެދުރާއްޖެތެރޭގެ ރަށްރަށުގެ ރަށު ކައުންސިލްތަކުގެ ރައީސުންނާއި، އަތޮޅު ކައުްނސިލްތަކުގެ ރައީސުންނާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ ރައީސާއިންނާއި އެ މަޝްވަރާ ބައްދަލުވުންތައް ކުރިއަށް ގެންދެއެވެ.
ކައުންސިލްތަކަށް އަމާޒުކޮށްގެން ފެށި މި ކޮންފަރެންސްގައި އިޖުތިމާޢީ މައްސަލަތަކުގެ ތެރެއިން ރަށް ގިރުމާއި، އުދައެރުން، ފެންބޮޑުވުން ފަދަ މުސުމީ މައްސަލަތަކަށް އެޑްރެސްކޮށް ރައީސް ވަނީ ވާހަކަފުޅު ދައްކަވާފަ އެވެ.
