އެމްޑީޕީއިން އާއްމުކޮށްފައިވާ އެޕާޓީގެ ދަފްތަރަރުގައި 94000 އަށްވުރެ ގިނަ މެމްބަރުން ތިބެއެވެ. އެހެން ނަމަވެސް އިލެކްޝަން ކޮމިޝަނުގައި އެމްޑީޕީގެ މެމްބަރުންގެ ގޮތުގައި ރަޖިސްޓަރީ ވެފައިވާކަމަށް ދައްކަނީ، 54782 މެމްބަރުންނެވެ.
ރޭ އެޕާޓީއިން ބޭއްވި ގައުމީ މަޖިލީހުގެ ޖަލްސާގައި އެޕާޓީގެ ދަފްތަރުގައި ތިބި މެމްބަރުންގެ ތެރެއިން އެ ޕާޓީގެ މެމްބަރުންގެ ގޮތުގައި ނެތް ފަރާތްތަކަށް އިލެކްޝަންސް ކޮމިޝަނުގެ ދަފްތަރުގައި ޖެހެން ތިން މަސްދުވަހުގެ މުހުލަތެއް ދީ، އެ ދަފްތަރު ރަނގަޅުކޮށް، އެއްގޮތް ކުރުމަށް ވަނީ ފާސްކޮށްފަ އެވެ.
އެގޮތުން އެޕާޓީގެ ދަފްތަރުގައި ތިބި އެހެން ނަމަވެސް އީސީގެ ދަފްތަރުގައި ނެތް 39000 މީހުންގެ ތެރޭ ހިމެނޭ އެހެން ޕާޓީ ތަކުގެ މީހުން އެ ޕާޓީއިން ވަކުކުރުމަށް ވެސް ވަނީ ނިންމާފަ އެވެ.
މީގެ އިތުރުން ރޭ ބޭއްވި ގައުމީ މަޖިލީހުގެ ޖަލްސާގައި އެ ޕާޓީގެ ކޮންގްރެސް އަންނަ އޮގަސްޓު މަހުގެ 19 ވަނަ ދުވަހު ބޭއްވުމަށްވެސް ވަނީ ފާސްކޮށްފަ އެވެ. އަދި އެ ކޮންގްރެސްގައި ބައިވެރިވާ ފަރާތަކީ، އީސީގެ އެމްޑީޕީގެ ދަފްތަރުގައި ނުހިމެނޭ ފަރާތެއްނަމަ ކޮންގްރެސްގައި ބައިވެރިވެވޭނީ ފުރަތަމަ 30 ދުވަހުގެ ތެރޭގައި އެ ދަފްތަރުގައި ޖެހޭ މީހުންނަށް ކަމަށްވެސް ވަނީ ނިންމާފަ އެވެ.
ރޭ ބޭއްވި އެޕާޓީގެ ގައުމީ މަޖިލީހުގެ ޖަލްސާގައި މިގޮތަށް ފާސްކުރީ، ރޭގެ ޖަލްސާގައި ބައިވެރިވި 90 މެމްބަރުންގެ ތެރެއިން 70 މެމްބަރުން ވޯޓު ދެއްވައިގެންނެވެ.
