ނޫނު އަތޮޅު ވެލިދޫ ކައިރީގައި އޮންނަ ރާފުށްޓާއި، ދިއްދޫ ފަތުރުވެރިކަމަށް ހާއްސަ ކޮށްގެން ތަރައްގީ ކުރުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ.
ރައްޔިތުންގެ މަޖިލީހުގައި މިއަދުގެ ޖަލްސާގައި މި ދެރަށުގެ މަސައްކަތް ނުފެށި ލަސްވަނީ ކީއްވެގެންތޯ ވެލިދޫ ދާއިރާގެ މެންބަރު މުހައްމަދު އަބުދުއް ޝަފީގު ކުރެއްވި ސުވާލަށް ޖަވާބުދެއްވަމުން ޓޫރިޒަމް މިނިސްޓަރު ޑރ އަބުދުﷲ މައުސޫމް ވިދާޅުވީ ނ އަތޮޅުގައި ފަތުރުވެރިކަމަށް ހާއްސަ އިސްކަމެއް ދެއްވުމަކީ ސަރުކާރުގެ ވިސްނުންފުޅެއް ކަމަށެވެ.
"ދިއްދޫ" އަކީ ޕްލޭނިންގ މިނިސްޓްރީގެ ބެލުމުގެ ދަށުގައި އޮންނަ ރަށެކެވެ. އެރަށުގެ އެއްބައި ޓޫރިޒަމް ތަރައްގީކުރަން ހާއްސަ ކޮށްފައިވާއިރު އެރަށުގެ އަނެއްބައި ވަނީ ދަނޑުވެރިކަމަށް ހާއްސަކޮށްފަ އެވެ.
މައުސޫމް ވިދާޅުވީ ދިއްދޫ އަކީ ޓޫރިޒަމް މިނިސްޓްރީގެ ބެލުމުގެ ދަށުގައި އޮތް ރަށެއް ނޫންކަމަށެވެ. ނަމަވެސް ދިއްދޫގައި ލަގްޒަރީ ވިލާ އަޅާފަ ރެސިޑެންޝަލް ޓޫރިޒަމް ކުރިއަށްގެންދިއުމަކީ ސަރުކާރުގެ ވިސްނުމެއް ކަމށޭވެ. އެހެން ކަމުން ޕްލޭނިން މިނިސްޓްރީން މިކަމަށް ވަރަށްބޮޑަށް ތައްޔާރުވަމުން އަންނަ ކަމަށެވެ.
ނ.ދިއްދޫ އެ ބަނޑައިދިއްދޫ އަކީ ޓޫރިޒަމް މިނިސްޓްރީގެ ބެލުމުގެ ދަށުގައިވާ ރަށެއް ނޫން. އެހެންނަމަވެސް ސަރުކާރުގެ ސިޔާސަތެއް ލަގްޒަރީ ވިލާ އަޅާފަ ރެސިޑެންޝަލް ޓޫރިޒަމް ކުރިއަށްގެންދިއުން. އެހެންވީމަ އެރަށުގެ އެެއްބައި ހައުސިން ޕްރޮޖެކްޓާއި ގުޅުވައިގެން ހައުސިން ވިލާ އެޅުމަށް ވަނީ ޕްލޭނިން މިނިސްޓްރީން ވަނީ ބިންދފޫކޮށްފަ. ދެން އެރަށުގެ އެއްބައި އެބޮތް އެގްރިކަލްޗަރަށް ދީފަ ވެސް. އެގްރިކަލްޗަރަށް އޮންނަ ބައިވެސް މި ބަލަނީ ޓޫރިޒަމަށް ބަދަލުކުރެވެންޏާ ބަދަލުކޮށްގެން ކުރިއަށް ގެންދަން." މަޖިލީހުގައި ޓޫރިޒަމް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ޓޫރިޒަމަށް ހާއްސަކޮށްގެން ދޫކޮށްފައިވާ ރަށްތަކުގެ މަސައްކަތް ނުފެށި ލަސްވުމަކީ އެންމެންގެވެސް ކަންބޮޑުވުން އޮތް ކަމެއް ކަމަށެވެ. އަދި ވިދާޅުވީ މިފަދަ ރަށްތައް ބަލަމުން ގެންދަވާ ކަމަށެވެ.
ނ. ރާފުށްޓާއިބެހޭ ގޮތުން މިނިސްޓަރު ވިދާޅުވީ އެރަށުގެ މަސައްކަތް ނުފެށި ލަސްވެފައިވަނީ އެމްއެމްޕީއާރުސީގެ ހިޔާނާތުގެ މައްސަލަ ހިމެނޭ ރަށަކަށް ވުމުން ބަލަންޖެހޭ އިތުރު ބެލުންތަކެއް ބެލުމުގައި ލަސްތަކެއް ހުރީ ކަމަށެވެ. ނަމަވެސް މިހާރު އެރަށް ކުއްޔަށް ނަގާފައިވާ ފަރާތުން އެރަށް ތަރައްގީކުރުމުގެ މަސައްކަތްތައް ފެށުމަށް ތައްޔާރުވަމުން އަންނަ ކަމަށެވެ.
ނ ރާފުށި ކުއްޔަށް ނަގައިގެން ފަތުރުވެރިކަމުގެ ގޮތުގައި ތަރައްގީ ކުރަނީ "އޭސް ރިސޯޓް ޕްރައިވެޓް ލިމިޓެޑް" އިންނެވެ.
