ކްރިމިނަލް ކޯޓުގައި މި މައްސަލައިގެ އެންމެ ފަހުން އަޑު އެހުމެއް ބާއްވާފައިވަނީ މިދިޔަ މަހުގެ 23 ވަނަ ދުވަހުގަ އެވެ. އެދުވަހުގެ އަޑުއެހުން ނިންމާލައްވަމުން މައްސަލަ ބައްލަވާ ގާޒީ ވިދާޅުވީ ދެން އޮންނަ އަޑުއެހުމެއްގައި އޮންނާނީ މި މައްސަލައަށް ހުލާސާ ބަޔާން ހުށަހެޅުމެވެ.
ހުލާސާ ބަޔާނަކީ ހުކުމް ކުރުމުގެ ކުރިން ބާއްވާނެ އެންމެ ފަހުގެ އަޑުއެހުމެވެ. މިމައްސަލައަށް ދައުލަތުގެ ވަކީލުންނާއި، ދިފާއީ ވަކީލުންވެސް ވަނީ ހެކި ހުށަހަޅާފަ އެވެ.
ތޫނު އެއްޗަކުން ބަޔަކު ހަމަލާދީ ޒިޔަދަމް މަރާލާފައިވަނި 20 މާޗް 2015 ވަނަ ދުވަހުގެ ރޭ މުންޑޫ ވަގުތީ ހިޔާގޭ ކައިރިން ހިނގާފައި ދަނިކޮށް، އޭނާގެ ކަރަށާއި ބުރަކަށްޓަށް އަދި ފަލަމަސްގަނޑަށް މަސްކަނޑާ ވަޅިއަކުން ހަމަލާދީގެންނެވެ.
މި މައްސަލައިގައި ދައުލަތުން ގަސްތުގައި މީހަކު މަރާލިކަމުގެ ދައުވާ އުފުލާފައިވަނީ ލ. މުންޑޫއަށް ނިސްބަތްވާ ޝިފާމް އާއި ޝަނޫނުގެ މައްޗަށެވެ. މީގެ އިތުރުން ޝަނޫނުގެ މައްޗަށް ވަނީ ބިރު ދެއްކުމާޢި ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ ދައުވާވެސް އުފުލާފަ އެވެ.
ޒިޔަދަމްގެ މަރުގެ މައްސަލަ: އެންމެ ފަހުން ބޭއްވި ޝަރީއަތުގެ އަޑުއެހުމުގެ ތެރެއިން
މި މައްސަލައަށް ގޮތެއް ނުނިމި ހަ އަހަރަށްވުރެ ގިނަ ދުވަސްވެފައިވާތީ މި މައްސަލައަށް އަވަހަށް ގޮތެއް ނިންމުމަށް މައްސަލަ ބައްލަވާ ގާޒީ އިސްމާއީލް ޝަފީއު ވަނީ ނިންމަވާފަ އެވެ.
މިގެ ކުރިން ކްރިމިނަލް ކޯޓުގައި ތިން ފަހަރަކު ތިން ގާޒީއެއް މި މައްސަލަ ބަލާފައިވެ އެވެ.
އަލީ ޒިޔަދަމް، މުންޑޫ ސިއްހީ މަރުކަޒަށް ގެންދިޔައިރުވެސް މަރުވެފައިވާ ކަމަށް އެތަނުން އޭނާ ބެލި ޑޮކްޓަރުން ވަނީ ބުނެފައެވެ. އޭނާގެ ބޮލަށާއި ބުރަކަށީގެ އިތުރުން ފައިގެ ފަލަމަސްގަނޑަށް ތޫނު އެއްޗަކުން ހަމަލާދީފައިވުމުން ފުން ޒަހަމްތަކެއް ހުރި ކަމަށް ވެސް އޭރު ޑޮކްޓަރު ވަނީ ބުނެފައެވެ.
