މިގޮނޑި ޕީޕީއެމްގެ ކެންޑިޑޭޓް ހއ.ވަށަފަރު، ނިއުފޯސް، ޒުހާ އިބްރާހީމް ކާމިޔާބު ކުރީ، މި ބައިއިލެކްޝަނަށް ޕީޕީއެމް ނޫން އެހެން ޕާޓީއަކުން ކެނޑިޑޭޓަކު ކުރިމަތިނުލުމާ ގުޅިގެންނެވެ.
މި ބައިއިލެކްޝަން ޕީޕީއެމް އިން ކާމިޔާބު ކުރިކަން އިއުލާން ކުރަމުން އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބް ކުރެއްވި ޓުވީޓެއްގައި ޕީޕީއެމްގެ ކެންޑިޑޭޓް ޒުހާއަށް މަރުހަބާ ދަންނަވަމުން އިތުރު ސިޔާސީ ޕާޓީތަކުން މި އިންތިހާބުގައި ވާދަ ނުކުރެއްވީ ކީއްވެތޯ ވަނީ ސުވާލު އުފައްދާފަ އެވެ. އަދި ސިޔާސީ ޕާޓީ ތަކުގެ އެންމެ ބޮޑު މަގްސަދަކީ އިންތިހާބު ތަކުގައި ވާދަކުރުން ކަމަށްވެސް ހަބީބު ވަނީ ވިދާޅުވެފަ އެވެ.
އިލެކްޝަންސް ކޮމިޝަނުން ވަނީ، ޖުލައި މަހުގެ ދެ ވަނަ ދުވަހު ވަށަފަރު ހިމެނޭހެން، ށ. ޅައިމަގު، ށ. ކޮމަންޑޫ، ކ. ތުލުސްދޫ އަދި އއ. ތޮއްޑޫ ގައި އިންތިހާބު ބާއްވަން ނިންމާފައެވެ.
