މިމައްސަލައަށް "ސީއެންއެމް" އަށް މައުލޫމާތުދެމުން ފަޒީލް އެންމެ ބޮޑަށް ފާހަގަކުރީ ޕީއެސްއެމްގެ ހިޔާނާތް ފޮރުވުމަށް ބޯޑުގެ މެންބަރުން ދެކޮޅުހަދަން އުޅޭކަމަށް ފާހަގަކުރެވޭ ވާހަކަ އެވެ.
އޭނާ ބުނީ ހިޔާނާތާ ގުޅޭ 30 މައްސަލައެއް ނުބަލައި އޮޑިޓް ޑިޕާޓްމަންޓް އުވާލީ ހިޔާނާތުގެ މައްސަލަތައް ނުބަލަން ވެގެންކަމަށެވެ.
ފަޒީލް ބުނީ ޕީއެސްއެމްގެ އޮޑިޓެއް އެކުލަވާލުމަށް 2021 ވަނަ އަހަރު އޮޑިޓް ޑިޕާޓްމަންޓެއް އެކުލަވާލި ކަމަށާއި، އޮޑިޓް ޑިޕާޓްމަންޓުން ޕީއެސްއެމްގެ 30 މައްސަލައެއް ބެލުމަށްފަހު 14 ރިޕޯޓެއް މި މައްސަލަތަކާއި ގުޅިގެން ޕީއެސްއެމްގެ ބޯޑަށް ހުށަހެޅި ކަމަށެވެ.
ފަޒީލް ބުނީ މި މައްސަލަތައް ބެލުމަށް ކުންފުނީގެ ބޯޑަށް ހުށަހެޅުމުން ބޯޑުން މިކަންކަމަށް އެއްވެސް އިޖާބައެއް ދީފައި ނުވާ ކަމަށެވެ. އަދި ބުނީ އޮޑިޓް ކޮމެޓީވެސް ކުންފުނީގެ ބޯޑުން އުވާލުމަށްފަހު އޮޑިޓް ބޯޑުގައި ތިއްބެވި ތިން މީހުން ވަޒީފާއިންވެސް ވަކިކަމަށެވެ.
އެންމެ ބޮޑު މައްސަލައިގެ ގޮތުގައި ފަޒީލް ފާހަގަކުރީ ޕީއެސްއެމް އިން ތިލަފުށީގައި ހިންގަމުންގެންދާ މީޑިއަމް ވޭވް ޕްރޮޖެކްޓެވެ. ވިދާޅުވީ މި ޕްރޮޖެކްޓަކީ ޑިޒައިން ބިލްޑް އުސޫލުން ސްރީލަންކާގެ "ޓާންތުރި" ކިޔާ ކުންފުންޏަކާއި ހަވާލުކޮށްގެން ތިލަފުށީގައި ކުރިއަށްގެންދަން ނިންމާފައިވާ މަޝްރޫއެއް ކަމަށެވެ. ފަޒީލް ބުނީ މި ޕްރޮޖެކްޓަކީ 2017 ވަނަ އަހަރުގައި ނިންމަޖެހޭ ޕްރޮޖެކްޓެއް ކަމަށެވެ. ނަމަވެސް އަދިވެސް މި ޕްރޮޖެކްޓް ތިލަފުށީގައި ކުރިއަށްދާ ކަމަށެވެ. ފަޒީލް ބުނީ މި ޕްރޮޖެކްޓް ހަވާލުކޮށްފައިވަނީ 5 މަސްދުވަހުގެ ތެރޭގައި ނިންމާ ގޮތަށް ކަމަށެވެ.
ދެވަނަ މައްސަލައެއްގެ ގޮތުގައި ފަޒީލް ފާހަގަ ކުރެއްވީ ޕީއެސްއެމްގެ އާކައިވް ޕްރޮޖެކްޓަށް 3 މިލިއަން ޑޮލަރު ހަރަދު ކުރި ވާހަކަ އެވެ. ބުނީ މި ޕްރޮޖެކްޓް ދީފައިވަނީ މެލޭޝިއާގެ ކުންފުންޏަކަށް ކަމަށެވެ. އަދި ބުނީ މިހާތަނަށް ޕީއެސްއެމްއިން އެއްވެސް ވަރަކަށް މެލޭޝިއާގެ ކުންފުންޏަށް ފައިސާ ދީފައި ނުވާ ކަމަށެވެ. އަދި މި ކުންފުނިން އެއްވެސް ވަރަކަށް އާކައިވް ކުރުމުގެ މަސައްކަތް ވެސް ކޮށްފައި ނުވާ ކަމަށެވެ.
ފަޒީލް ބުނީ އޮޑިޓް ޑިޕާޓްމަންޓް އުވާލުމަށްފަހު މަސައްކަތްކުރި 3 މީހުން ވަޒީފާއިން ވަކިކުރީ 3 މަސްދުވަހުގެ ނޯޓިސްއެއް ދީފައިކަމަށެވެ.
