މި އަހަރުގެ ބޯހިމެނުން ކުރިއަށް ގެންދިއުމަށް ހަމަ ޖެހިފައިވަނީ މިއަހަރުގެ ސެޕްޓެމްބަރު 13 އާއި 14 އަދި އެ މަހުގެ 17-25 އަށެވެ.
ބޯހިމެނުމުގެ މަސައްކަތުގައި ހަރަކާތްތެރިވާނެ ފަރާތްތައް ހޯދުމަށް ބިއުރޯ އޮފް ސްޓެޓިކްސް އިން އެންމެ ފުރަތަމަ އިއުލާން ކުރީ، މި އަހަރުގެ ފެބްރުއަރީ މަހުގެ 17 ވަނަ ދުވަހު އެވެ. އެއިދާރާއިން ބުނީ، ޓްރެއިނަރުންނާއި އެނިއުމޭޓަރުންގެ ގޮތުގައި 4،400 މީހުން ބޭނުންވާ ކަމަށެވެ.
އެ ފުރުސަތު މިދިޔަ މޭ މަހުގެ ނިޔަލަށް ހަމަވެފައި ވާއިރު، އަދިވެސް އެއިދާރާއިން ބޭނުންވާ ވަރަށް މިކަމުގެ ހަރަކާތްތެރިވާނެ މީހުން ވަނީ ނުލިބިފަ އެވެ. އެހެން ކަމުން އެއިދާރާއިން ވަނީ މިމަހުގެ 12 ވަނަ ދުވަހުގެ ނިޔަލަށް ބޯހިމެނުމުގެ ހަރަކާތުގައި ބައިވެރިވާނެ ފަރާތްތައް ހޯދުމަށް އަނެއްކާވެސް އިއުލާން ކޮށްފަ އެވެ.
ބޯހިމެނުމުގެ މަސައްކަތުގައި ހަރަކާތްތެރިވާ ފަރާތްތަކަށްދޭ ތަމްރީންތައް ފުރިހަމަ ކުރުމަށް އަންނަ ދުވަސްތަކުގައި ދުވާލަކަށް 100 ރުފިޔާ ލިބޭ އިރު، ބޯހިމެނުގެ މަސައްކަތުގައި 7-11 ދުވަހު އުޅެފިނަމަ ނިކުންނަ ކޮންމެ ދުވަހަކަށް 500 ރުފިޔާގެ ގެ އެލަވެންސެއް ދިނުމަށް އެއިދާރާއިން ވަނީ ނިންމާފަ އެވެ.
ބިއުރޯ އޮފް ސްޓެޓިކްސް އިން ބުނީ، މި މަސައްކަތުގައި ހަރަކާތްތެރިވާން ޝައުގުވެރިވާ ފަރާތްތަކުން މިލިންކުން މަސައްކަތައް އެދި ހުށަހެޅޭނެ ކަމަށާއި، އިތުރު މައުލޫމާތު ސާފުކުރަން ބޭނުން ނަމަ، 3008400 ނުވަތަ 3008408 އަށް ގުޅައިގެން މައުލޫމާތު ސާފުކުރެވޭނެ ކަމަށެވެ.
