އޮސްޓްރޭލިއާގެ ނޫސްތަކުން ރިޕޯޓުކޮށްފައިވާގޮތުން، ވެސްޓަން އޮސްޓްރޭލިއާ އިން ވިކްޓޯރިއާއަށް އެލެގްޒެންޑްރީއާ ނާޔާދް ކިޔާ މީހަކު ވަނީ މަސްތުވާތަކެތި އެތެރެ ކުރުމަށް މަސައްކަތް ކޮށްފަ އެވެ. އޭނާގެ ގެއިން ފުލުހުން ވަނީ މަސްތުވާތަކެތި ހޯދާފަ އެވެ.
އެ ގެއިން އޮސްޓްރޭލިއާ ފުލުހުން ވަނީ ކިލޯއަކަށް ވުރެ ގިނަ މަސްތުވާތަކެތީގެ އިތުރުން މަނާ ހަތިޔާރެެއް ވެސް ހޯދާފަ އެވެ.
އޭނާގެ ގެއިން، ގާތް ގަނޑަކަށް އެއްކިލޯގެ މެތް، 84 ގްރާމުގެ ކޮކެއިން ވަނީ ފެނިފަ އެވެ. އަދި މަނާކޮށްފައިވާ ހަތިޔާރެއް ވެސް އެގެއިން ފެނިފައިވެ އެވެ. އެތަކެތި ހުރީ އެގޭ ބަދިގޭގައި ފޮރުވާފަ އެވެ.
އިތުބާރު ހުރި ގޮތަކަށް މައުލޫމާތު ލިބިފައިވާ ގޮތުގައި މި އަންހެން މީހާ އަކީ ރާއްޖޭގައި ފުޅާ ދާއިރާއެއްގައި ވިޔަފާރިކުރާ، ސިމްޑީ ކުންފުނީގެ ވެރިޔާ އިބްރާހިމް މުހައްމަދު ދީދީ (ސިމްޑީ ދީދީ) ގެ ކުރީގެ ދަނބި ދަރި އެކެވެ.
އެނގިފައިވާ ގޮތުގައި މަސްތުވާތަކެތި ފެނުނީ އޮސްޓްރޭލިއާގެ އެޕަލްކްރޮސްގެ ގެއަކުންނެވެ. ސިމްޑީ ދީދީ ވެސް ދިރިއުޅުއްވަނީ އެޕަލްކްރޮސްގައި ހުންނަ ގެއެއްގަ އެވެ.
އެލެގްޒެންޑްރީއާ ނާޔާދް
އޮސްޓްރޭލިއާގެ ނޫސްތަކުން ވެސް ރިޕޯޓު ކުރާގޮތުގައި އޭނާ އާ ދިވެހި ރާއްޖޭގެ ހޮޓެލް ޗެއިނަކާ ގުޅުން އޮވެ އެވެ.
ވެސްޓް އޮސްޓްރޭލިއާ ފުލުހުން ވަނީ 129،000 ޑޮލަރުގެ ޕާރިސަލެއް ވެސް އޭޕްރީ މަހުގެ ތެރޭގައި ހިފަހައްޓަފަ އެވެ. މިއީ މި ކޭސްއާ ގުޅުން ހުރި ފައިސާ ކަމަށް އޮސްޓްރޭލިއާ ފުލުހުން ބުނެ އެވެ.
މި މައްސަލަ މިހަރު އޮތީ އޮސްޓްރޭލިއާ ކޯޓުގަ އެވެ.
އެޑިޓަރުގެ ނޯޓް:
މިހަބަރުގެ ފަސް ވަނަ ޕެރެގްރާފު މިހާރު ވަނީ ރަނގަޅުކޮށްފަ އެވެ.
