އެމްޓީސީސީގެ "ރާއްޖެ ޓްރާންސްޕޯޓް ލިންކް"ގެ ބަހުގެ ހިދުމަތް ހުޅުމާލޭ ދެވަނަ ފިޔަވަހީގަައި ފެށުމަށް ރޭ ބޭއްވި ރަސްމިޔާތުގައި ވާހަކަފުޅުދަައްކަވަމުން ރައީސް ސޯލިހު ވިދާޅުވީ، ދެވަނަ ފިޔަވަހީގައި ދިރިއުޅޭ ފަރާތްތަކަށް ފަސޭހައިން ސިއްހީ ހިދުމަތް ފޯރުކޮށްދިނުމަށްޓަކައި ސަރުކާރުން މަސައްކަތްތަކެއް ކުރަމުންދާ ކަމަށެވެ.
އެގޮތުން ތިން ކްލިނިކަކާއިއެކު އެކު ތިން ފާމަސީއެއްގެ ހިދުމަތް ދިނުމަށް ނިންމާފައިވާ ކަމަށެވެ.
އިއްޔެގެ ވަގުތެއްގައި ދެވަނަ ފިޔަވަހީގައި ގާއިމުކުރި ފުރަތަމަ ކްލިނިކް ވަނީ ހުޅުވާފަ އެވެ. ރޭގެ ރަސްމިއްޔާތުގައި ރައީސް ވަނީ ހުޅުމާލޭ ދެވަނަ ފިޔަވަހި އާބާދުވެ ނިމޭ އިރު ގާތްގަނޑަކަަށް 70،000 މީހުން އެތަނުގައި ދިރިއުޅޭނެކަމަށް ލަފާކުރެވޭތީ، އެތަނަށް ބޭނުންވާ މިންވަރަށް ހިދުމަތްތައް ގާއިމުކުރުމާއި ހިދުމަތްތައް ފުޅާކުރުމުގެ މުހިންމުކަން ފާހަގަކުރައްވާފަ އެވެ.
އޭގެތެރެއިން ކުރެވޭ މަސައްކަތުގެ ތެރެއިން ހިޔާ ސަރަހައްދުގައި ދިރިއުޅޭ ކިޔަވާ ކުދިންނަށް ހާއްސަކޮށް އަށް ސްކޫލަކާއި، އިތުރު ދެ ޕްރީސްކޫލު އެޅުމަށް ސަރުކާރުން ނިންމާފަވާކަމަށް ވެސް ރައީސް ސޯލިހު ވިދާޅުވި އެވެ.
އޭގެތެރެއިން މިހާރު އެއް ސްކޫލާއި ދެ ޕްރީސްކޫލުގެ މަސައްކަތް ނިމި ހުޅުވިފަވާކަން ފާހަގަކުރެއްވި އެވެ.
މީގެ އިތުރުން 3000 މީހުންގެ ޖާގަ ހިމެނޭ މިސްކިތެއްވެސް އެ ސަރަހައްދުގައި އެޅުމުގެ މަސައްކަތް ކުރަމުންދާ ކަމަށާއި، އަމިއްލަ ފަރާތަކުން އަޅާ މިސްކިތެއްގެ މަސައްކަތް ވެސް ކުރިއަށްދާ ކަން ފާހަގަކުރެއްވި އެވެ. އަދި މިހާރު ވެސް ސަރުކާރުން އަޅާފަވާ ވަގުތީ ދެ މިސްކިތާއި، އަމިއްލަ ފަރާތަކުން އަޅާފަވާ ދެ މިސްކިތް ބޭނުންކުރަމުންދާކަން ވެސް ފާހަގަކުރެއްވި އެވެ.
