ޕީޕީއެމްގެ މެޖޯރަޓީއެއް އޮންނަ ފުނަދޫ އަށް ރައީސް އިބްރާހިމް މުހައްމަދު ސޯލިހު މިއަދު ވަޑައިގަންނަވަން ހަމަޖެހިފައިވަނީ އެ ރަށު ސްކޫލަށް 50 އަހަރު ފުރުމުގެ މުނާސަބާ ފާހަަގަކުރުމުގެ ގޮތުން ނެވެ.
ފުނަދޫ ކައުންސިލުގެ ރައީސް އަހްމަދު މުހައްމަދުފުޅު "ސީއެންއެމް" އަށް މިއަދު ވިދާޅުވީ، ކައުންސިލުން ރައީސްގެ ރަސްމީ ހާއްސަ އެ ދަތުރުފުޅަށް ތައްޔާރުވެ، ހޫނު މަރުހަބާއެއް ކިއުމަށް ރަށުތެރެ ޒީނަތްތެރިކުރަމުންދާތާ ދެ ދުވަސް ވެއްޖެ ކަމަށެވެ.
އެކަމަށްޓަކައި ބަނދަރާއި ރަށުތެރޭގައި ގައުމީ ދިދަ ދަމާ މަރުހަބާ ކިއުމަށް ތައްޔާރުވެފަ ވަނިކޮށް މިއަދު އިރުއެރިއިރު، އެމްޑީޕީގެ ކެމްޕެއިން ޓީމުން އެޕާޓީގެ ރިޔާސީ ކެންޑިޑޭޓަކީ ރައީސް ސޯލިހު ކަމަށް ބުނެ، މަރުހަބާ ކިޔާ، ބެނާ ދަމާފައިވާ ކަމަށް ކައުންސިލުގެ ރައީސް ވިދާޅުވި އެވެ.
އެކަމާއި ގުޅިގެން ރަށުތެރޭގައި ހިތްހަމަ ނުޖެހުންތައް ބޮޑުވެފައިވާ ކަމަށާއި، ރައްޔިތުން އެ ރަސްމިޔާތައް ތައްޔާރުވަމުން ދިޔައީ ސިޔާސީ ކަންކަން އެކަހެރިކޮށްފަ ކަމަށް އަހްމަދު ވިދާޅުވި އެވެ.
އަހްމަދު ވިދާޅުވީ، އެކަން ކޮށްފައިވަނީ، ފުނަދޫ ދާއިރާގެ މަޖިލިސް މެމްބަރު މުހައްމަދު ޝާހިދުގެ އެންގެވުމަށް ކަމަށެވެ. އެގޮތުން އެކަމާއި ގުޅިގެން ރަށުތެރޭގައި މަޝްރަހު ހޫނުވެފައި ވާތީ، ސްކޫލު ޕީޓީއޭ އިން އެމްޑީޕީގެ ކެމްޕެއިން ޓީމާއި، ޕީޕީއެމްގެ ޓީމާއި ވެސް ބައްދަލު ކުރުމުން، ދަމާފައިވާ ބެނާތަކަކީ ސީދާ ރައީސް އޮފީހުން ފޮނުވި ބެނާތަކެއް ކަމަށް އެބައްދަލުވުމުގައި އެމްޑީޕީގެ ކެމްޕެއިން ޓީމުން ބުނެފައިވާ ކަމަށް، ކައުންސިލުގެ ރައީސް ވިދާޅުވި އެވެ.
މިކަމާއި ބެހޭގޮތުން ރައީސް އޮފީހުގެ ބަހެއް އަދި ނުލިބެ އެވެ.
ނަމަވެސް އެމްޑީޕީން ކެމްޕެއިން ބެނާ ދެމީ މެމްބަރު ޝާހިދު އަންގައިގެން ކަމަށް ކުރާ ތުހުމަތު އެނާ ދޮގުކުރެ އެެވެ.
ޝާހިދު "ސީއެންއެމް" އަށް ވިދާޅުވީ އެފަދަ އެންގުމެއް އަންގާފަ ނުވާނެ ކަމަށާއި، ނަމަވެސް އެމްޑީޕީގެ އިސް ލީޑަރު ފުނަދުއަށް ވަޑައިގަންނަވާއިރު، މަރުހަބާ ކިއުމަކީ، ޕީޕީއެމް އިން އެމީހުންގެ ލީޑަރަށް މަރުހަބާ ކިޔާހެން، އެމްޑީޕީ މެމްބަރުންނަށްވެސް އޮތް ފުރުސަތެއް ކަމަށެވެ.
ރައީސް ސޯލިހު މިއަދު ފުނަދޫއަށް ވަޑައިގަންނަވާގޮތަށް އޮތީ ހަވީރު 16:00 ގައެވެ. އަދި އެ ރަށު ސްކޫލަށް 50 އަހަރު ފުރުމުގެ ރަސްމިއްޔާތު ރައީސް ޝަރަފުވެރިކޮށްދެއްވާނެ އެވެ. ކައުންސިލުން ވަނީ އެ ހާއްސަ ރަސްމިއްޔާތައް ވަރަށް ބޮޑަށް ރަށުތެރެ ޒީނަތްތެރި ކޮށްފަ އެވެ.
ނަމަވެސް މިއަދު އިރުއެރިއިރު، އެމްޑީޕީން ދަމާފައިވާ ބެނާގައި ވަނީ "2023ގެ އެމްޑީޕީގެ ރިޔާސީ ކެނޑިޑޭޓު ރައީސް ސޯލިހަށް މަރުހަބާ" ޖަހާފައިވާ ބޭނާތަކަކާއި، "ފުނަދޫއަށް ބޭނުން ވަނީ ތިޔަ ފަދަ ރައީސް އެއް" ފަދަ އިބާރާތް ޖަހާފައިވާ ބެނާތަކެއް ދަމާފަ އެވެ.
މިހެންވެ، ޕީޕީއެމްގެ މެޖޯރިޓީއެއް އޮންނަ އެ ރަށުގެ މަޝްރަހު ވަރަށް ބޮޑަށް ގޯސްވެފައިވާއިރު، ކައުންސިލުން މިހާރު ވަނީ މިއަދު ތިނެއް ޖެހުމުގެ ކުރިން އެ ބެނާތައް ނުނަގާފިނަމަ ރައީސް އަށް ހޫނު މަރުހަބާއެއް ކިއުމަށް ދަމާފައިވާ ގައުމީ ދިދަފަތިތައް ނަގާނެ ކަމަށް އަންގާފަ އެވެ.
ރައީސް މިރޭ 08:30 ގައި އޮންނަ ސްކޫލުގެ ރަސްމިއްޔާތުގައި ބައިވެރިވުމަށް ފަހު ފުނަދޫއިން ފުރާވަޑައިގަންނަވާނީ މާދަމާ ހެނދުނެވެ. ދެން ވަޑައިގަންނަވާނީ ނ. ހޮޅުދޫ މޭނާ ސްކޫލަށް 75 އަހަރު ފުރުމުގެ މުނާސަބަތުގައި ބައިވެރިވުމަށް އެ ރަށަށެވެ.