އައިލެންޑް އޭވިއޭޝަން (އޭއައިއޭ) ވަނީ ބަނގުރޫޓޫވެފައި ކަމަށާއި، މުއައްޒަފުންނަށް މުސާރަ ދިނުމުގައިވެސް ދަތިތަކެއް ހުރިކަމަށް ބުނެ ކުއްލި މައްސަލަ މަޖިލީހަށް ހުށަހެޅީ މާވަށު ދާއިރާގެ މެންބަރު އަހުމަދު ސައީދެވެ.
މަޖިލީހުގައި މިއަދު ސައީދު ހުށަހެޅުއްވި ކުއްލި މައްސަލައިގައި ބުނެފައިވަނީ ރާއްޖޭގެ ގައުމީ އެއާލައިން ދުވަހަކުވެސް ދަށަށް ނުދާހާ ވަރަށް މިހާރު ދަށަށް ގޮސްފައިވާކަމަށާއި، ކުންފުނީގެ ދަރަނި ބޮޑުވެ ކުންފުނި ބަނގުރޫޓުވާން ކައިރިވެފައިވާ ކަމަށެވެ.
ސައީދު ވިދާޅުވީ ކުންފުނި ހިންގުމަށް އިންޑިޔާއިން 17.3 މިލިއަން ރުފިޔާގެ ލޯނެއް ނަގާފައިވާ ކަމަށާއި، ސްޓޭޓް ބޭންކް އޮފް އިންޑިއާއިން ދޫކޮށްފައިވާ އޯވާޑްރާފްޓް ފެސިލިޓީގެ ދަރަނީގެ އަދަދު 46.2 މިލިއަން ރުފިޔާ އަށް އަަރާފައިވާ ކަމަށެވެ.
މަޖިލީހުގައި މި މައްސަލަ އަށް ވޯޓުގައި ބައިވެރިވީ ޖުމްލަ 33 މެންބަރުން ނެވެ. އަދި 28 މެންބަރަކު ވަނީ އައިލެންޑް އޭވިއޭޝަން ކުންފުނި ބަނގުރޫޓު ނުވާކަމަށް ނިންމައި އެ ބިލަށް ތާއީދު ނުކުރުމަށް ނިންމާފަ އެވެ.
