"ސީއެންއެމް" އަށް މައުލޫމާތު ދެއްވަމުން އިންފޮމޭޝަން ކޮމިޝަނަރު އަޙުމަދު އާހިދު ރަޝީދު މިރޭ ވިދާޅުވީ މިފްކޯ އިން ސާފުކުރަން ބޭނުންވާ މައުލޫމާތެއް ސާފު ނުކުރެވުމުން އެކަން ބަލައި ދިނުމަށް އެ ކޮމިޝަނަށް ހުށަހެޅި ކަމަށާއި، އެކަމުގައި މިފްކޯއަށް އަންގަންޖެހޭ އެންގުންތައް އެ ކޮމިޝަނުން މިއަދު އަންގާފައިވާ ކަމަށެވެ.
އާހިދު ވިދާޅުވީ މައުލޫމާތު ބޭނުންވާ ފަރާތައް އެ މައުލޫމާތު ފޯރުކޮށްދިނުމަށް އަންނަ މަހުގެ 7 ވަނަ ދުވަހާއި ހަމައަށް ފުރުސަތު ދީފައިވާ ކަމަށެވެ.
އަމިއްލަ ފަރާތަކުން މިފްކޯއަށް ހޯދުމަށް ހުށަހެޅި މައުލޫމާތަކީ އެ ކުންފުނިން މީޑިއާތަކާ އެކު ވެފައިވާ ވިޔަފާރީގެ އެއްބަސްވުންތަކުގައި ހިމެނޭ ކަންކަން ކަމެވެ. އެއީ މީޑިޔާތަކުގައި މިފްކޯއިން ސްޕޮންސާ ކުރުމުން އެ ކުންފުނިންދޭ ފައިސާގެ ވާހަކަ އެވެ. މައުލޫމާތު ހޯދުމާއި ލިބިގަތުމުގެ ގާނޫނުގެ ދަށުން އެ މައުލޫމާތުތަކަށް އެދުނީ "ދިޔަރެސް" ނޫހުން ނެވެ.
މިފްކޯއިން އެ މައުލޫމާތު ފޯރުކޮށްނުދިން ސަބަބެއްގެ ގޮތުގައި ފާހަގަކޮށްފައިވަނީ އެ މައުލޫމާތަކީ ކުންފުނީގެ ވިޔަފާރި އާ ގުޅުންހުރި ސިއްރު ހިމެނޭ މައުލޫމާތު ކަމަށްވުމުން އެފަދަ މައުލޫމާތު ފޯރުކޮށް ނުދެވޭނެ ކަމަށެވެ.
މިފްކޯއަށް ދީފައިވާ މުއްދަތުގައި އެފަރާތަށް މައުލޫމާތު ފޯރުކޮށް ނުދެވިއްޖެނަމަ ދެން ކަންތައް ކުރާނެ ގޮތާއިބެހޭގޮތުން ސީއެންއެމްއިން ސުވާލުކުރުމުން އާހިދު ވިދާޅުވީ މަގުބޫލު އުޒުރެއްނެތި މައުލޫމާތު ފޯރުކޮށްނުދީފިނަމަ އެޅިދާނެ ފިޔަވަޅުތަކެއްވެސް ހުންނާނެ ކަމަށެވެ. ނަމަވެސް މިހާލަތުގައި އަދި ފިޔަވަޅު އެޅުމުގެ ބަދަލުގައި ބޭނުންވަނީ މައުލޫމާތު ހޯދަން ބޭނުންވާ ފަރާތައް އެ މައުލޫމާތު ފޯރުކޮށްދިނުން ކަމަށެވެ.
އާހިދު ވިދާޅުވީ އެ ކޮމިޝަނުން މިފްކޯއަށް ދީފައިވާ މުއްދަތުގައި އެ މައުލޫމާތު ފޯރުކޮށް ނުދީފިނަމަ މައުލޫމާތު ހޯދަން އެދުނު ފަރާތުން ދަށު ކޯޓަކަށް މި މައްސަލަ ހުށަހެޅިދާނެ ކަމަށެވެ. އަދި ވިދާޅުވީ މި މުއްދަތުގައި މިފްކޯއިން މި މައުލޫމާތު ދިނުމަށް އިންކާރުކޮށް މި މައްސަލަ ހައިކޯޓުގައި އިސްތިއުނާފު ކުރުމުގެ ފުރުސަތުވެސް އޮންނާނެ ކަމަށެވެ.