އިސްލާމިކް މިނިސްޓްރީން މިހެން ބުނެފައި ވަނީ، މިމަހުގެ 15 ވަނަ ދުވަހު އެ މިނިސްޓްރީގެ ސީނިއާ އެގްޒެކްޓިވް ޑިރެކްޓާ ހިޝާމް އަހުމަދު ސޮއި ކުރައްވާ ކޮމިޝަނާ އޮފް ޕޮލިސް މުހައްމަދު ހަމީދުއަށް ފޮނުވި ސިޓީއެއްގަ އެވެ. 

އިސްލާމިކް މިނިސްޓްރީން ފޮނުވި ސިޓީގައި ބުނެފައިވަނީ، ދިވެހި ރާއްޖެއަކީ ސައްތައިން ސައްތަ މުސްލިމު ގައުމަކަށް ވީހިނދު، އަދި ގާނޫނު އަސާސީގައި ވާގޮތުން ދިވެހި ދައުލަތުގެ ދީނަކީ އިސްލާމްދިން ކަމަށް ވީހިނދު، ދިވެހިންގެ ތެރޭގައި ޒަމާނުއްސުރެ އޮންނަ
ދީނީ އެއްބައވަންތަކަން ދެމެހެއްޓުމަކީ، ރާއްޒެގެ މިނިވަންކަމާއި ސިޔާދަތު ރައްކާތެރިކޮށް، ރާއްޖޭގެ އަމަންއަމާންކަމާއި ސުލްހަ މަސްލަހަތު ދެމެހެއްޓުމަށްޓަކައި ކޮންމެހެން ބޭނުން ކަމެއް ކަމުގައިވާތީ، ދިވެހި ރައްޔިތުންގެ ދީނީ އެއްބައިވަންތަކަން ހިމާޔަތް ކުރުމަކީ
ދިވެހި ސަރުކާރާއި ދިވެހި ރައްޔިތުންގެ މައްޗަށް ލާޒިމްވެފައިވާ ކަމެއް ކަމަށެވެ. 

އަދި ދިވެހި ރައްޔިތުންގެ ދީނީ އެއްބައިވަންތަކަން ހިމާޔަތް ކުރުމުގެ ގާނޫނުގައިވާ ގޮތުން، ދިވެހި ރައްޔިތުންގެ ދީނީ އެއްބައިވަންތަކަން ނަގާލުމަށް ސައްކަތް ކުރުމާއި މީހުންގެ މެދުގައި ދިނީގޮތުން ހިލާފު އުފެދޭ ބާވަތުގެ ވާހަކަ ދެއްކުމާއި އެފަދަ ގޮތްގޮތަށް އަމަލު ކުރުމާއި، މިއިން އެއްވެސް ކަމެއް ކުރުމަކީ ނުވަތަ ކުރަން އުޅުމަކީ މަނާ ކަމެއް ކަމަށް ސިޓީގައި ވަނީ ބުނެފަ އެވެ.

އިސްލާމިކް މިނިސްޓްރީން އިތުރަށް ސިޓީގައި ބުނެފައިވަނީ، ޔޯގާ އަކީ ހިންދޫއިންގެ އަޅުކަމެއް ކަމަށާއި، އެކަމަކީ އެމީހުންގެ ދީނުގެ ސަގާފަތެއް ކަމަށެވެ. އަދި ޔޯގާ އަކީ، އިރުއަރާ ވަގުތު އިރަށް ކުރުނީސްކޮށް އަދި ހިންދޫއިންގެ ބުދު ފައްޅީގައި އަޅުނަކް ކުރުމުގައި ބޭނުންކުރާ މިއުޒިކް ހިމެނޭ ހަރަކާތެއް ކަމަށެވެ. 

އިސްލާމިކް މިނިސްޓްރީން މި ސިޓީ ފުލުހަށް ފޮނުވި ނަމަވެސް މިކަމަށް ސަމާލުކަން ނުދީ ގަލޮޅު ދަނޑުގައި ވަނީ، ޔޯގާ ޑޭ ހަރަކާތް ބާއްވާފަ އެވެ. އެ ހަރަކާތް ހުއްޓުވާ، އެކަމަށް ހުރަސް އެޅި މައްސަލަ އާއި ގުޅިގެން މިހާތަނަށް 19 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ.