މި މައްސަލަ އާއި ގުޅިގެން ދައުލަތުން ވަނީ، އޭރު 18 އަހަރު ނުފުރޭ ދެކުދިންނާއި، އިތުރު ދެމީހެއްގެ ދައުވާ އުފުލާފަ އެވެ. މި މައްސަލާގައި މީގެ ކުރިން ކޯޓުން ވަނީ، ނޫރުގަޔަށް ވަޅި ހެރި ކުއްޖާ މެރުމަށް ހުކުމް ކޮށްފަ އެވެ. މީގެ އިތުރުން މި މައްސަލާގައި ހިމެނޭ ދެވަނަ ކުޑަކުއްޖާ 10 އަހަރަށް ޖަލަށް ލުމަށް ކޯޓުން ވަނީ މީގެ ކުރިން ހުކުމް ކޮށްފަ އެވެ.
މި މައްސަލަ އާއި ގުޅިގެން މިއަދު ކްރިމިނަލް ކޯޓުން ކުރި ހުކުމުގައި މި މައްސަލާގައި ދައުލަތުން ދެން ދައުވާ އުފުލާފައިވާ، 26 އަހަރުގެ މުހައްމަދު ސަމީހު އާއި، 25 އަހަރުގެ މުހައްމަދު ޝަމްލު 25 އަހަރަށް ޖަލަށް ލުމުށް ވަނީ ހުކުމް ކޮށްފަ އެވެ. މި ދެ މީހުންނަކީވެސް ފުވައްމުލަކަށް ނިސްބަތްވާ ދެ މީހުންނެވެ.
މި ދެ މީހުންގެ މައްޗަށް 25 އަހަރު ދުވަހުގެ ޖަލު ހުކުމެއް އިއްވި ނަމަވެސް މި މައްސަލަ އާއި ގުޅިގެން މި ދެމީހުން ބަންދުގައި ހޭދަކުރި މުއްދަތު އުނިކުރުމުން މި ދެމީހުން ޖަލު ބަންދުގައި ތިބެންޖެހެނީ، 17 އަހަރާއި ނުވަ މަސް ދުވަހެވެ.