ޖެންޑަ މިިނިސްޓްރީން މިއަދު އާއްމުކޮށްފައިވާ މެއި މަހުގެ ތަފާސް ހިސާބުތަކުން ދައްކާގޮތުގައި، ކުޑަކުދިންނާއި ގުޅޭ ޖުމްލަ 278 މައްސަލަ މެއި މަހު ވަނީ ރިޕޯޓުކޮށްފަ އެވެ. އޭގެތެރޭގައި ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 137 މައްސަލަ، ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 49 މައްސަލަ، އާއިލީ 31 މައްސަލަ ހިމެނެއެވެ.
އަދި ނުކުޅެދުންތެރިކަން ހުންނަ ފަރާތްތަކާއި އުމުރުން ދުވަސްވީ މީހުނަށް އަޅައިލުމާއި އެހީތެރިކަން ބޭނުންވެގެން 19 މައްސަލަ އާއި، ހައްގުތަކުން ކުޑަކުދިން މަހްރޫމުކުރުމުގެ 2 މައްސަލަ އަކާއި، ކުޑަކުދިންގެ އަހުލާގާ ގުޅުން ހުރި 19 މައްސަލައެއްގެ އިތުރުން އަމިއްލަ ނަފުސަށް ގެއްލުންދިނުމާ ގުޅޭ 14 މައްސަލަ ހިމެނެއެވެ.
ކުޑަކުދިންނަށް ކުރާ އެކި ބާވަތުގެ އަނިޔާ
މީގެ ޖުމްލަ 137 މައްސަލަ ރިޕޯޓުކޮށްފައިވާއިރު، އޭގެ ތެރެއިން އެންމެ ގިނަ މައްސަލަ ހުށަހެޅިފައިވަނީ، ޖިންސީ ހާނިކައި އާއި ޖިސްމާނީ ހާނިކައިގެ މައްސަލަތަކެވެ. އެގޮތުން މި ބާވަތުގެ 31 މައްސަލަ ރިޕޯޓުކޮށްފައިވެ އެވެ. މީގެ އިތުރުން،
- އިހުމާލުވުމުގެ 26 މައްސަލަ،
- ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ 20 މައްސަލަ،
- އެހެންކުދިންގެ ފަރާތުން ގަނާ ލިބުމުގެ 9 މައްސަލަ
- ނަފްސާނީ ހާނިކައިގެ 9 މައްސަލަ
- ބިރުދެއްކުމުގެ ގޮތުން ކުރެވޭ ކަންކަމުގެ 4 މައްސަލަ
- ނަހަމަ ގޮތުގައި ބޭނުންކުރުމުގެ 3 މައްސަލަ
- ނަހަމަ ގޮތުގައި ވިޔަފާރި ފައިދާ އަށް ބޭނުންކުރުމުގެ 2 މައްސަލަ
- އެހެން ކުދިންގެ ފަރާތުން އިންޓަނެޓް މެދުވެރިކޮށް ގަނާ ލިބުމުގެ 2 މައްސަލަ ހުށަހެޅިފައިވެއެވެ.
ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާ
މި ފަދަ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައި ވަނީ ޖިސްމާނީ އަނިޔާކުރުމުގެ 25 މައްސަލަ އެވެ. މިބާވަތުގެ މައްސަލަތަކުގެ އިތުރުން،
- ނަފްސާނީ އަނިޔާކުރުން/ އަނގަބަހުންކުރެވޭ އަނިޔާކުރުމުގެ 13 މައްސަލަ،
- ބިރުދެއްކުމުގެ ގޮތުން ކުރެވޭ ކަންތައްތަކުގެ 5 މައްސަލަ
- ޖިންސީ ހާނިއްކަ ކުރުމުގެ 3 މައްސަލަ
- ނަހަމަގޮތުގައި ބޭނުންކުރުމުގެ 1 މައްސަލަ
- އިހުމާލުވުމުގެ 1 މައްސަލަ
- ގަދަކަމުން ޖިންސީ ގޯނާކުރުމުގެ 1 މައްސަލަ ހިމެނެ އެވެ.
ޢާއިލީ މައްސަލަތައް
އާއިލީ 31 މައްސަލަ މެއިމަހު ހުށަހަޅައިފައި ވެއެވެ.
- މި ފަދަ މައްސަލަތަކުގެ ތެރޭގައި ޙަޟާނާތު ނުވަތަ ކުދިންނާ ބައްދަލުކުރުމުގައި ޖެހޭ 15 މައްސަލަ
- ކުދިން ބެލުމުގައި ޖެހޭ 7 މައްސަލަ
- ކުދިންނާއި ބައްދަލުކުރުމުގައިޖެހޭ 6 މައްސަލަ
- ދަރިންގެ ހަރަދު ދިނުމުގައި ޖެހޭ 3 މައްސަލަ ހިމެނެއެވެ.
އަމިއްލަ ނަފުސަށް ގެއްލުން ދިނުން
އަމިއްލަ ނަފުސަށް ގެއްލުންދިނުމާ ގުޅޭ 14 މައްސަލަ މެއި މަހު މިނިސްޓްރީއަށް ރިޕޯޓުކޮށް އެޓެންޑްކޮށްފައިވެ އެވެ. އެއީ،
- ސްސައިޑަލް ތައުޓްސްގެ 2 މައްސަލަ
- ސްސައިޑަލް ބިހޭވިއާގެ 8 މައްސަލަ
- އަމިއްލަ ނަފްސަށް ގެއްލުން ދިނުމުގެ 4 މައްސަލަ
ހައްޤުތަކުން ކުޑަކުދިން މަހްރޫމުކުރުން
ހައްޤުތަކުން ކުޑަކުދިން މަހްރޫމުކުރުމުގެ ދެ މައްސަލަ މެއިމަހު ވަނީ ރިޕޯޓުކޮށްފަ އެވެ.
- އެއީ އައިޑީ ކާޑް/ ޕާސްޕޯޓް/ އުފަންދުވަހުގެ ސެޓްފިކެޓް ހޯދުމާއި ބެހޭ 1 މައްސަލަ
- ކުދިން ސްކޫލަށް ނުފޮނުވުމުގެ 1 މައްސަލަ އެވެ.
އަހުލާގީ މައްސަލަތައް
ކުޑަކުދިންގެ އަހުލާގާ ގުޅުން ހުރި 19 މައްސަލަ މެއިމަހު ވަނީ ހުށަހަޅައިފަ އެވެ. މިފަދަ މައްސަލަތަކުގެ ތެރޭގައި،
- ގެއިން ނިކުމެގެން ދިއުމުގެ 7 މައްސަލަ
- ސްކޫލަށް ދާން ބޭނުންނުވުމުގެ 5 މައްސަލަ
- ރުޅިއިސްކުރުން/ރުޅިގަދަވެގެން އުޅުމުގެ 3 މައްސަލަ
- ރުޅިވެރި، ގަވާއިދާ ހިލާފު ނުވަތަ އިޖުތިމާއީ ގުޅުން ބަދަހި ކުރުމަށް އުޒުރުވެރިވާ އަމަލުތަކުގެ 2 މައްސަލަ
- ސުލޫކީ 1 މައްސަލަ
- ކުށުގެ ވެއްޓަށް ހުށަހެޅިދާނެފަދަ އަމަލުތަކުގެ 1 މައްސަލަ ހިމެނެ އެވެ.
