އދ. ފެންފުށީގައި ހުޅަނގު ތުނޑި ސަރަހައްދުގައި އުޅެނިކޮށް އެރި ރާޅާއެކު ދެ ޒުވާނަކު މިއަދު ވަނީ ގެއްލިފަ އެވެ. ނަމަވެސް ކުޑަ ވަގުތުކޮޅެއްގެ ތެރޭގައި އެތަނުން އެކަކު ވަނީ ފެނިފަ އެވެ. ދެވަނަ މީހާ ފެނުނީ އޭނާ ހޯދުމުގެ މަސައްކަތް ކުރަމުންދަނިކޮށް ދާދި ދެންމެއަކު އެވެ.
ފެންފުށިން މިއަދު ގެއްލުނު ދެ މީހުންގެ ތެރެއިން އެކަކީ އެރަށަށް ނިސްބަތްވާ ހައިޝަމް އިބްރާހިމް އެވެ. އޭނާގެ ހާލު ރަނގަޅެވެ.
ދެވަނަ މީހަކީ ތ.ދިޔަމިގިލީ މީހެކެވެ.
"ސީއެންއެމް" އަށް މައުލޫމާތު ދެއްވަމުން ފެންފުށީ ކައުންސިލްގެ ރައީސް އަހުމަދު އަބުދުއް ސަކޫރު ވިދާޅުވީ ގެއްލިގެން ހޯދަމުންދިޔައީ ދިޔަމިގިއްޔަށް ނިސްބަތްވާ ޒުވާނާ ކަމަށާއި، އޭނާ ފެނިފައިވަނީ ފެންފުއްޓާއި ދިމާލު ފަޅުތެރެއިން ކަމަށް މައުލޫމާތު ލިބިފައިވާ ކަމަށެވެ.
ޝަކޫރު ވިދާޅުވީ ގެއްލުނު ޒުވާނާ ހޯދުމަށްފަހު ފެންފުށީ ހޮސްޕިޓަލަށް ފަރުވާ ދިނުމަށް ގެންދިޔަ ކަމަށެވެ، ނަމަވެސް އޭނާގެ ހާލު ސީރިއަސް ވުމުން އިތުރު ފަރުވާ އަށް މިވަގުތު މަހިބަދޫ ހޮސްޕިޓަލަށް ގެންގޮސްފައިވާ ކަމަށެވެ.
ގެއްލިގެން ހޯދަމުން ދަނިކޮށް ފެނުނުއިރު ހާލު ސީރިއަސް ވި ދިޔަމިގިއްޔަށް ނިސްބަތްވާ ޒުވާނާއަކީ ޗުއްޓީ ހޭދަކޮށްލުމަށް ފެންފުށްޓަށް ދިޔަ ޒުވާނެއް ކަމަށް ކައުންސިލުން ބުންޏެވެ.
