މޯލްޑިވްސް އެއާޕޯޓް ކޮމްޕެނީ (އެމްއޭސީއެލް) އާއި އެސްޓިއޯ ގުޅިގެން އިއްޔެ ވަނީ ފްލައިޓްތަކަށް ތެޔޮ ވިއްކާވަރު ކޮންޓްރޯލްކުރުމާއި ގުޅޭގޮތުން ނޫސްވެރިންގެ ބައްދަލުވުމެއް ބާއްވާފަ އެވެ.
މި ނޫސްވެރިންގެ ބައްދަލުވުމުގައި މައިގަނޑު ގޮތެއްގައި އެސްޓިއޯ އާއި އެމްއޭސީއެލް އިންވެސް ފާހަގަކޮށްފައިވަނީ ޖެޓް ފިއުލް ކޮންޓްރޯލް ކުރުމަށް މެދުވެރިވި ސަބަބުތަކުގެ ވާހަކަ އެވެ. އެގޮތުން ދުނިޔޭގެ ބާޒާރުގައި ތެލުގެ އަގު އުފުލުމާއި، ދުނިޔެ އަށް ދިމާވެފައިވާ އިގްތިސާދީ ކާރިސާތަކުގެ ސަބަބުން ތެޔޮ ރާއްޖެއަށް ސަޕްލައި ކުރުމުގައި ހުރި ގޮންޖެހުން ތަކުގެ ވާހަކަ ފާހަގަ ކުރެއްވި އެވެ.
މި ބައްދަލުވުމުގައި ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުން އަމްރު ވިދާޅުވީ މިފަދަ އިގްތިސާދާއި ގުޅޭ މައްސަލަ ތަކުގެ ވާހަކަތައް ގެނެސްދޭއިރު ވަރަށް ބޮޑަށް މައުލޫމާތު ސާފުކުރެއްވުމަށް އެންމެހާ ފަރާތްތަކަށްވެސް ދަންނަވާ ކަމަށެވެ.
އަމްރު ވިދާޅުވީ މިފަދަ މައުލޫމާތު ރައްޔިތުންނަށް އޮޅޭގޮތަށް ފެތުރުމުން އެކަމުގެ އަސަރު ކުރަނީ ހަމައެކަނި ވަކި ފަރުދަކަށް ނޫން ކަމަށާއި، އެކަމުގެ އަސަރު މުޅި ގައުމަށްވެސް ކުރާނެ ކަމަށެވެ.
އަމްރު ވިދާޅުވީ މިފަދަ މައުލޫމާތު ބައެއް ފަރާތްތަކުން ހާމަކުރަނީ ސިޔާސީ މަންފާއެއް ހޯދުމަށް ކަމަށްވާނަމަ އެކަން ހުއްޓާލުމަށް އެދޭ ކަމަށެވެ.
އެމްއޭސީއެލް އާއި އެސްޓިއޯ ގުޅިގެން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އެމްއޭސީއެލްގެ މެނޭޖިން ޑިރެކްޓަރު މަހުޖޫބު ޝުޖާއު ވިދާޅުވީ އެއާލައިންތަކަށް ވިއްކާ ފިއުލްގެ ރޭޓު މި ވަގުތަށް ކޮންޓްރޯލް ކުރަން ޖެހުނު ނަމަވެސް ކޮންމެ އެއާލައިނަކުން ވެސް ދަތުރު ކުރަން ބޭނުންވާ މަންޒިލަށް ދެވޭ ވަރަށް ތެޔޮ ފޯރުކޮށްދެވޭނެ ކަމުގެ ޔަގީންކަން އެބަ އޮތް ކަމަށެވެ.
ޝުޖާއު ވިދާޅުވީ ތެޔޮ ނުލިބިގެން އެއާލައިންތަކުގެ އޮޕަރޭޝަނަށް އެއްވެސް ބުރޫ ނާރާނެކަމުގެ ޔަގީންކަން އަރުވާ ކަމަށެވެ.
