ރައީސް ޔާމީނަށާއި ޕީޕީއެމް/ޕީއެންސީއަށް ތާއީދުކުރާ ފަރާތްތަކުގެ ހިތްތަކުގައި ޕާޓީއާއިމެދު ނަފްރަތާއި ނުތަނަވަސްކަން އުފައްދާ އެމަނިކުފާނުގެ ނަންފުޅު ކިލަބުކުރަން ބަޔަކު މަސައްކަތް ކުރަމުންދާ ކަމަށް ބުނެ، މިއަދު އެ ކޯލިޝަނުން ބޭއްވި ކުއްލި ނޫސްވެރިންގެ ބައްދަލުވުމުގައި ޕީއެންސީގެ ރައީސް އަބްދުރަހީމް އަބްދުﷲ ވިދާޅުވީ، އެމަސައްކަތް އެންމެ ބާރަށް ކުރައްވަމުން ގެންދަވަނީ ޖުމްހުރީ ޕާޓީގެ ލީޑަރު ގާސިމް އިބްރާހިމް ކަމަށެވެ.
އެގޮތުން މީޑިއާތަކަށް ހަރަދުކޮށްގެން ޕީޕީއެމްގެ ނަން ކިލަބުކުރަން އާޓިކަލް ޖައްސަވާ ކަމުގެ ތުހުމަތު އަދުރޭ ކުރެއްވި އެވެ.
އެއީ ބޭކާރުކަމެއްކަން ފާހަގަކޮށް އަދުރޭ ވިދާޅުވީ، 2023 ވަނަ އަހަރުގެ ވޯޓުކަރުދާސްކޮޅުގައި ރައީސް ޔާމީންގެ ނަންފުޅު އޮންނާނެ ކަމަށެވެ.
އަދުރޭ ވިދާޅުވީ، އެ ވޯޓު ކަރުދާހުގައި ރައީސް ޔާމީންގެ ނަންފުޅު ނުބާއްވަން ސަރުކާރާއި، ސަރުކާރާއި ގުޅިފަވާ ކޯލިޝަނުން ކުރަމުންދާ އެއްވެސް މަސައްކަތެއްވެސް ކާމިޔާބެެއް ނުވާނެ ކަމަށެވެ. އަދި އެއިން ޕާޓީއަކާއިއެކު 2023 ގައި ކޯލިޝަން ނަހާދާނެ ކަމަށްވެސް ވިދާޅުވި އެވެ.
ރައީސް ޔާމީން ޖަލަށް ވަޑައިގެންނެވުމުންވެސް ޕާޓީ ރޫޅޭނެ ކަމުގެ ނުބައި ހީތައް މީހުންގެ ހިތްތަކަށް ވައްދައިގެން ކުރި މަސައްކަތުގެ ތެރެއިން އެ ޕާޓީން މެމްބަރުން ގެއްލިގެން ދިޔަކަން އަދުރޭ ފާހަގަކުރެއްވި އެވެ.
ނަމަވެސް ޖަލުން މިނިވަންވެ، ވަޑައިގެންނެވުމާއި ހަމަޔަށް ޔާމީންގެ ފަހަތުގައި ޕާޓީ އޮތްކަން ފާހަގަކުރައްވާ އަދުރޭ ވިދާޅުވީ، ޖަލަށް ލެވިގެން ދިއުން ވެގެން ދިޔައީ ޕާޓީ އިތުރަށް ވަރުގަދެެވެގެން ދިޔަ ކަމެެއް ކަމަށެވެ. އަދި ޖަލުން މިނިވަން ވުމާއިއެކު ޕާޓީ އިތުރަށް ވަރުފަދަވެގެން ދިޔަ ކަމަށްވެސް އަދުރޭ ވިދާޅުވި އެވެ.
ޖަލުން މިނިވަންވެ ވަޑައިގެން މިވަގުތު ހުންނެވި ނަމަވެސް އެމަނިކިފާނާއި ދެކޮޅަށް ކޯޓުތަކުގައި އަދިވެސް މައްސަލަތައް ދަނީ ހިނގަމުން ނެވެ.
