ބޮރިސް އިގިރޭސިވިލާތުގެ ބޮޑުވަޒީރުކަމަށް އައްޔަން ކުރެވުނީ 2019ވަނަ އަހަރު އެވެ. އޭނާ މިއަދު ބޮޑުވަޒީރުކަމުން އިސްތިއުފާ ދެއްވާފަވަނީ، ކޮންޒަވޭޓިވް ޕާޓީގެ ލީޑަރުކަމުންވެސް އިސްތިއުފާ ދެއްވުމަށްފަހު އެވެ.
އިސްތިއުފާ ދެއްވަމުން ދެއްވި ސްޕީޗުގައި އޭނާ ވިދާޅުވީ، އިސްތިއުފާ ދެއްވި ނަމަވެސް އާ ބޮޑުވަޒީރަކު އައްޔަންވުމާއި ހަމަޔަށް އެމަގާމުގައި ހުންނަވާނެ ކަމަށެވެ.
ބޮރިސް އިސްތިއުފާ ދެއްވާފަމިވަނީ، އޭނާ އާއި ގުޅޭ ގިނަ މައްސަލަތަކެއް ފެންމަތިވަމުން ގޮސް، ޖިންސީ ފުރައްސާރައިގެ ތުހުމަތު ކުރެވޭ ކުރީގެ ޑެޕިއުޓީ ޗީފް ވިޕް ކްރިސް ޕިންޗާއަށް މަގާާމެއް ދިން މައްސަލަ ހޫނުވެ، ސަރުކާރު ތެރެއިން ގިނަ ވަޒީރުންނާއި، ގާނޫނު ހަދާ މަޖިލީހުގެ މެމްބަރުން ތިން ދުވަސްތެރޭ އިސްތިއުފާ ދެއްވާފަވަނިކޮށެވެ.
އެގޮތުން އަންގާރަ ދުވަހުން ފެށިގެން މިއަދާއި ހަމަޔަށް ގާނޫނު ހަދާ މަޖިލީހުގައި ހިމެނޭ ވެރިކަން ކުރާ ޕާޓީއަށް ނިސްބަތްވާ 50 މެމްބަރުން ވަނީ އިސްތިއުފާ ދެއްވާފަ އެވެ.
މިމީހުން އިސްތިއުފާ ދީފައިވަނީ ބޮރިސްގެ އިސްތިއުފާއަށް ގޮވާލާ، ފިނޭންސް މިނިސްޓަރު ރިޝީ ސުނަކް އާއި، ހެލްތު ސެކެރެޓަރީ ސާޖިދް ޖާވިދު އިސްތިއުފާ ދެއްވުމުންނެވެ.
އެ ވަޒީރުން ހިމެނޭހެން 40 ވަޒީރުންވަނީ ބޮރިސްގެ ދަށުން މަސައްކަތް ކުރެވެން ނެތްކަމަށްބުނެ، އިސްތިއުފާދީފަ އެވެ.
