ދެހާސް ނަވާރަވަނަ އަހަރު އެ އިމާރާތުގައި އިއްޒުއްދީން ސުކޫލް ހިންގަން ފަށާފައި ވާއިރު، އެ އިމާރާތް އަލުން ހޯދުމަށާއި، އެކަމާއި ގުޅިގެން ލިބިފައިވާ ގެއްލުމުގެ ބަދަލު ހޯދުމަށް މާލޭ ހައި ޕްރައިވެޓް ލިމިޓެޑުން ސިވިލް ކޯޓުގައި ވަނީ މީގެ ކުރިން ދައުވާ ކޮށްފަ އެވެ. އެހެން ނަމަވެސް ސިވިލް ކޯޓުން ނިންމީ އެތަން އެ ކުންފުންޏާއި ހަވާލު ނުކުރެވޭނެ ކަމަށެވެ.
މާލޭ ހައި ޕްރައިވެޓް ލިމިޓެޑުން އެދުނު ގޮތާއި ހިލާފަށް ސިވިލް ކޯޓުން މައްސަލަ ނިންމުމުން، އެ ކުންފުނިން ވަނީ ސިވިލް ކޯޓުގެ ނިންމުން ހައިކޯޓުގައި އިސްތިއުނާފް ކޮށްފަ އެވެ. އޭގެ އިތުރުން އެ ކުންފުނިން ވަނީ އެ އިމާރާތުގައި އެއްވެސް ކަމެއް ނުކުރުމަށާއި އެ އިމާރާތުގައި ހިންގަމުން އަންނަ އިއްޒުއްދީން ސުކޫލްއަށް އިތުރު ދަރިވަރުން ނުވެއްދުމުގެ ވަގުތީ އަމުރަކަށްވެސް އެދިފަ އެވެ.
މި މައްސަލައާއި ގުޅިގެން ދައުލަތުން ވަނީ، ކޯޓުގައި މާލެ ހައިގެ ފަރާތުން އެދުނު ކަންކަމަކީ މި މައްސަލާގައި އެ ކުންފުނިން ކުރިން ދައުވާކޮށް، ސުޕްރީމް ކޯޓުގެ މަރުހަލާއިން ނިމި ނިހާއީ ހުކުމުގެ ދަރަޖަ ލިބުނު ގަޒިއްޔާތަކުގައިވެސް އެ ކުންފުނިން އެދިފައިނުވާ ކަންކަން ކަމަށެވެ. އަދި ގެއްލުމުގެ ބަދަލުގެ ގޮތުގައި އެ އިމާރާތް އަނބުރާ ހޯދުމުގެ ހައްގު މާލެ ހައިއަށް ނޯންނާނެ ކަމަށެވެ.
އެހެން ނަމަވެސް ހައި ކޯޓުން މިދިޔަ ބުރާސްފަތި ދުވަހު ނިންމި ނިންމުމުގައި ވަނީ، އެ އިމާރާތް ބޭނުން ނުކުރުމަށް އެދުނު ވަގުތީ އަމުރު ނެރެދެވެން ނެތް ކަމަށް ނިންމާފަ އެވެ. އަދި އެފަދަ އަމުރެއް ނެރެފިނަމަ ލިބޭ ގެއްލުން މާ ބޮޑުވާނެ ކަމަށްވެސް ވަނީ ބުނެފަ އެވެ.
މި ނިންމުމަކީ އެމްއީއެސް އިމާރާތުން މާލެ ހައި ނެރުނީ ރަނގަޅަށް ނޫންކަމަށް ސުޕްރީމް ކޯޓުން ކަނޑައެޅުމާ ގުޅިގެން ބަދަލު ހޯދުމަށް ސިވިލް ކޯޓުގައި މާލެ ހައިގެ ފަރާތުން ކުރި ދައުވާ އެ ކުންފުންޏަށް ނާކާމިޔާބުވުމުން ހައިކޯޓުގައި އިސްތިއުނާފުކުރި މައްސަލައާ ގުޅިގެން އެ ކުންފުނިން ހޯދަން އެދުނު އަމުރަކާ ގުޅިގެން އެ ކޯޓުން ނިންމި ނިންމުމެކެވެ.
