ރަނިލް އެގައުމުގެ ރައީސް ކަމުގެ މަގާމަށް އިންތިހާބު ކުރައްވާފައި ވަނީ، ލަންކާގެ މަޖިލީހުގެ 134 މެމްބަރުންގެ ވޯޓުންނެވެ. ޖުމްލަ 223 މެމްބަރުން ވޯޓު ދެއްވި އިރު، އޭގެ ތެރެއިން އެއްވެސް ކޮޅަކަށް ވޯޓު ނުދެއްވާ ދެ މެމްބަރުން ތިއްބެވި އެވެ. 219 ވޯޓެއް ސައްހަ ވޯޓުގެ ގޮތުގައި ކަނޑައަޅާފައި ވާއިރު، ހަތަރު ވޯޓެއް ސައްހަ ނޫން ކަމަށް ވަނީ ކަނޑައަޅާފަ އެވެ. 

ރައީސް ކަމަށް ދެން ވާދަކުރެއްވި ދުލާސް އައްލަހަޕެރޫމާއަށް 82 ވޯޓު ލިބުނުއިރު، އަނޫރާ ކުމާރާ ޑިސަނަޔަކައަށް ލިބުނީ ތިން ވޯޓެވެ.

މި އިންތިހާބު ކާމިޔާބު ކުރެއްވުމާއި އެކު ރަނިލް ވިކްރަމްސިންހަ އަކީ ލަންކާގެ އަށް ވަނަ ރައީސް ކަމަށް އެގައުމުގެ މަޖިލީހުން ވަނީ އިއުލާން ކުރައްވާފަ އެވެ. 

ރަނިލް އަށް އެގައުމުގެ ރައީސް ކަން ވަގުތީ ގޮތުން ހަވާލު ކުރެއްވީ، އެގައުމުގެ ރައީސް ކަމުގެ މަގާމުގައި ހުންނެވި ގޮޓަބަޔާ ރާޖަޕަކްސަ މިމަހުގެ 16 ވަނަ ދުވަހު އެމަގާމުން އިސްތިއުފާ ދެއްވުމާއި ގުޅިގެންނެވެ. އޭގެ ކުރިން އެގައުމުގެ ބޮޑުވަޒީރުގެ މަގާމުން، މަހިންދްރަ ރާޖަޕަކްސަ އިސްތިއުފާ ދެއްވުމުން، އެގައުމުގެ ބޮޑުވަޒީރު ކަމަށް ރަނިލް އައްޔަން ކުރެއްވީ ގޮޓަބަޔާ އެވެ. 

ރަނިލް އެންމެ ފަހުން އެގައުމުގައި ބޭއްވި ރިޔާސީ އިންތިހާބުން ނާކާމިޔާބީ އާއި ކުރިމަތިލައްވަން ޖެހުމާއި، 2020 ވަނަ އަހަރު އެގައުމުގެ މަޖިލީހަށް އިންތިހާބު ނުވުމުން އެގައުމުގެ ގިނަ ރައްޔިތުންގެ ތާއީދު ރަނިލް އަށް ނެތް ކަމަށް ވަނީ މީގެ ކުރިން ރިޕޯޓް ކޮށްފަ އެވެ.