ހއ. އަލައިދޫ ރިސޯޓް ކުރިން ހިންގަމުން ދިޔަ ޔޮޓް ޓުއާސް އިން މި މައްސަލަ ސުޕްރީމް ކޯޓަށް ހުށަހެޅީ، އެ ރިޒޯޓަށް 2014 ވަނަ މޫސުން ގޯސްވުމުގެ ސަބަބުން ލިބުނު ގެއްލުންތަކާއި ގުޅިގެން އެލައިޑް އިން އިންޝުއަރަންސް ފައިސާ ދިނުމަށް ދެކޮޅު ހެދުމުން، އެ ފައިސާ ހޯދުމަށް ސިވިލް ކޯޓަށް ހުށަހެޅުމުން، އެ ކޯޓުން އެ ފައިސާ ދެއްކުމަށް، އެލައިޑްގެ މައްޗަށް ކުރި ހުކުމް ހައި ކޯޓުން ބާތިލް ކުރުމުންނެވެ.
ސިވިލް ކޯޓުން އެލައިޑްގެ މައްޗަށް މި ހުކުމް ކޮށްފައިވަނީ 2020 ވަނަ އަހަރުގެ ޖުލައި 19 ވަނަ ދުވަހު އެވެ. އަދި ހުކުމް ކޮށްފައިވަނީ، ހުކުމް ކުރާ ދުވަހުން ފެށިގެން ހަ މަސް ދުވަހުގެ ތެރޭގައި ދައްކައި ހަލާސް ކުރަން ޖެހޭ ގޮތަށެވެ.
ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރުގެ ކުންފުނި ޔޮޓް ޓުއާޒް އަށް ދެއްކުމަށް އެލައިޑް އިންޝުއަރަންސްގެ މައްޗަށް ކުރި ހުކުމް ބާތިލް ކުރަމުން ހައި ކޯޓުން ކުރި ހުކުމުގައި، އެ ރިޒޯޓަށް ލިބިފައިވާ ގެއްލުމަކީ، އިންޝުއަރަންސް ގެ ތެރޭގައި ހިމެނޭ ފަދަ ގެއްލުމެއްކަން ސާބިތު ވާން ނެތް ކަމަށެވެ.
އަދި އެ ރިޒޯޓަށް ގެއްލުން ލިބުނު އިރު، އިންޝުއަރަންސްގައި ބަޔާންކޮށްފައިވާ ކަންކަން އެ ކުންފުނިން ފުރިހަމަ ކޮށްފައި ނުވާކަންވެސް ހައިކޯޓުން ވަނީ ބުނެފަ އެވެ.
ޔޮޓް ޓުއާޒް އިން މި މައްސަލަ ސުޕްރީމް ކޯޓުގައި އިސްތިއުނާފް ކުރި ނަމަވެސް މި މައްސަލަ ބަލައިގަތުމާއި މެދު އަދި ސުޕްރީމް ކޯޓުން ގޮތެއް ކަނޑައަޅާފައި ނުވެ އެވެ.
