އައްޑޫސ ސިޓީ ސ.ހިތަދޫ ދާއިރާގެ ބައި-އިލެކްޝަންގައި، ވޯޓުލުމުގެ ޙައްޤުލިބިފައިވާ 12099 މީހުންގެ ތެރެއިން ވޯޓުލުމުގައި ބައިވެރިވެ ވޯޓުލާފައި ވަނީ ޖުމްލަ 1009 މީހުންނެވެ. އެއީ ވޯޓު ލުމުގެ ހައްގު ލިބިގެންވާ މީހުންގެ ތެރެއިން އެންމެ އަށް ޕަސެންޓެވެ.
ކަންބޮޑުވުން ފާޅުކުރައްވައި އިލެކްޝަން ކޮމިޝަނުގެ ނައިބް ރައީސް އިސްމާއީލް ހަބީބް ވިދާޅުވީ ވޯޓު ލުމަށް އަދި މިކަމަށް އިންތިޒާމުތައް ހަމަޖެއްސުމަށް އެތަކެއް ލައްކަ ރުފިޔާ ހަރަދުކޮށްފައިވާ ކަމަށެވެ. އަދި މިފައިސާތައް އިސްރާފުވީ ކަމަށެވެ.
ހަބީބް ވިދާޅުވީ މިފަދަ މައްސަލަތަކަށް ވިސްނައި މިކަންކަމަށް ހައްލު ގެންނަން ޖެހޭ ކަމަށެވެ.
"ޑަބްލިޔޫ.ޑީ.ސީ، ސ.ހިތަދޫ ދާއިރާގެ ބައި-އިލެކްޝަންގައި، ވޯޓުލުމުގެ ޙައްޤުލިބިފައިވާ 12099 މީހުންގެ ތެރެއިން، 1009 (%8.34) މީހުން ވޯޓުލާން، އެތައް ލައްކަރުފިޔާ ޚަރަދުކުރުމަށްވުރެ ބޮޑު އިސްރާފެއް ކޮބައިތޯ؟ މިކަމަށް އަވަސްޙައްލެއް ގެންނަން އެބަޖެހޭ" ހަބީބް ވިދާޅުވި އެވެ.
ސ.ހިތަދޫ ދާއިރާގެ ބައި އިލެކްޝަންގައި މިއަދު ވާދަކުރެއްވީ އެމްޑީޕީގެ ކެންޑިޑޭޓް އައިމިނަތު ޝާހިދާ އާއި، ޕީޕީއެމްގެ ކެންޑިޑޭޓް ފާތިމަތު ނަޒީހާ އަހުމަދެވެ.
މި އިންތިހާބު ކާމިޔާބު ކުރެއްވީ ޕީޕީއެމްގެ ކެންޑިޑޭޓް 567 ވޯޓު ހޯއްދަވައިގެން ފާތިމަތު ނަޒީހާ އަހުމަދެވެ. އެމްޑީޕީގެ ކެންޑިޑޭޓް އައިމިނަތު ޝާހިދާ އަށް ލިބުނީ ޖުމްލަ 426 ވޯޓެވެ.
