މަބްރޫކް މިހެން ވިދާޅުވެފައި މިވަނީ، މިނިވަން ދުވަހުގެ ރަސްމިއްޔާތުގައި ރައީސް ސޯލިހު މިއަދު ގައުމާއި މުހާތަބު ކުރައްވާ ދެއްކެވި ވާހަކަފުޅުގައި، ތެލުގެ ސަބްސިޑީ ދެމުން އަންނަ ގޮތް ބަދަލު ކުރުމުގެ ވިސްނުމެއް ގެންގުޅުއްވާ ކަމަށް ވިދާޅުވި ވާހަކަ ބައެއް މީޑިއާ ތަކުން ރައްޔިތުންނަށް އޮޅޭގޮތަށް ގެނެސްދެމުން ގެންދިއުމާއި ގުޅިގެންނެވެ.
ރައީސް އޮފީހުގެ ތަރުޖަމާނު މަބްރޫކް މިއަދު "ސީއެންއެމް" އަށް މައުލޫމާތު ދެއްވަމުން ވިދާޅުވީ ފަތުރަމުންދަނީ ހަގީގަތާއި ހިލާފު ވާހަކަތަކެއް ކަމަށާއި، ސަބްސިޑީ ކަނޑާލުމަށް ރައީސް ވިދާޅުވެފައި ނުވާ ކަމަށެވެ.
މީގެ އިތުރުން މަބްރޫކް ވިދާޅުވީ، ރައީސް ދެއްކެވީ ތެލުގެ ސަބްސިޑީ އަށް ބަދަލު ގެންނަންޖެހޭ ވާހަކަ ކަމަށާއި، އެކަމާ ގުޅޭ ތަފްސީލްތައް ފަހުން ހިއްސާ ކުރާނެ ކަމަށެވެ.
އަދި ހަގީގަތާއި ހިލާފު ވާހަކަތައް މީޑިއާގައި ހިއްސާ ނުކުރުމަށް ވެސް މަބްރޫކް ވަނީ އިލްތިމާސްކޮށްފަ އެވެ.
ރައީސް ދެއްވި ހިތާބުގައި މިަދު ވިދާޅުވީ ތެލުގެ ސަބްސިޑީއަށް ހަރަދު ކުރުމަށް ސަރުކާރުން އަންދާޒާ ކުރި މިންވަރަށްވުރެ މާބޮޑުތަނުން އިތުރުވެފައިވާ ކަމަށާއި، މި މައްސަލަތައް ދިމާވެފައިވަނީ ޔޫކްރެއިންގެ ހަނގުރާމަ އާއި ގުޅިގެން ދުނިޔޭގެ ތެލުގެ ބާޒާރަށްވެސް ބޮޑެތި ބަދަލުތަކެއް އައުމާއި، ގުޅިގެން ކަމަށެވެ.
މީގެ އިތުރުން ރައީސް ވިދާޅުވީ ސަރުކާރުން މަސައްކަތް ކުރަނީ އެހިނދަކު ދުނިޔެ އަށް ކުރިމަތިވާ ކޮޅިގަނޑަކުން ރާއްޖެ ސަލާމަތްކޮށް ރައްޔިތުން ގޮވައިގެން އަމާން ބަނދަރަކަށް ވާސިލް ވުމަށް ކަމަށެވެ. އަދި ވެފައިވާ ވައުދުތައް ފުއްދުމަށް މަސައްކަތް ކުރުމަށެވެ.
