އައިބީސީގެ ބޯޑީބޯޑިން ވޯލްޑް ޓުއާގެ އެއް މުބާރާތް ކަމަށްވާ "ވިޒިޓް މޯލްޑިވްސް ޕްރޯ 2022" އޮންނާނީ މާލޭ ރާޅުގަނޑު ސަހަރައްދުގައި މިއަދުން ފެށިގެން އޮގަސްޓް މަހުގެ ހަތްވަނަ ދުވަހުގެ ނިޔަލަށެވެ. މިއަދު ހަވީރު، މި އިވެންޓް ރަސްމީކޮށް ހުޅުއްވައިދެއްވީ ރައީސް އިބްރާހީމް މުހައްމަދު ސާލިހެވެ.
ރައީސްވަނީ މުބާރާތް ރަސްމީކޮށް ހުޅުއްވައިދެއްވައި މިއަދު އޮތް އެގްޒިބިޝަން ބައެއް އިވެންޓްތައް ބައްލަވާލައްވާފައެވެ. ދުނިޔޭގެ ޗެމްޕިއަން ބޮޑީބޯޑަރުން ވާދަކުރާ މި މުބާރާތުގައި އެކި ގައުމުތަކުން ސަތޭކަ ފަންސާހެއްހާ އެތްލީޓުން ވާދަކުރާނެ ކަމަށްވަނީ މައުލޫމާތު ލިބިފައެވެ.
މި މުބާރާތުގައި ބައިވެރިވުމަށް ބޮޑީ ބޯޑިންގެ ދުނިޔޭގެ އަންހެން އަދި ފިރިހެން ޗެމްޕިއަނުން މިހާރުވަނީ ރާއްޖެ އައިސްފައެވެ. މި މުބާރާތުގައި ދިވެހި އެތްލީޓުންވެސް ވާދަކުރާނެއެވެ. ހަތަރު ކެޓަގަރީއަކުން ބައިވެރިވާ ވާދަކުރާ މި އިވެންޓަކީ ވޯލްޑް ޓުއާގެ ލެގެއް އޭޝިއާ ސަރަހައްދުގައި ބާއްވާ ފުރަތަމަ ފަހަރެވެ.
