ކްރިމިނަލް ކޯޓުން ނިޝާން ދޫކޮށްލުމަށް ނިންމާފައި މިވަނީ، އޭނާ ފުލުހުންގެ ބަންދުގައި ހުންނަތާ މަސް ދުވަހަށް ވުރެ ގިނަ ދުވަސް ވެފައި ވަނިކޮށެވެ.
ކްރިމިނަލް ކޯޓުން މިއަދު ނިޝާން ދޫކޮށްލުމަށް ނިންމާފައި ވާއިރު، އެ ކޯޓުން ވަނީ، މާލެ އިން ބޭރަށް ނިޝާން ދާނަމަ އެކަން އެންގުމަށާއި، ނިޝާން އާއި ގުޅޭނެ ފޯނު ނަންބަރު ބަދަލުވެއްޖެނަމަ އެކަން އެންގުމަށް ޝަރުތު ކޮށްފަ އެވެ. މީގެ އިތުރުން ފުލުހުން ތަހުގީގަށް ހާޒިރުވާން އަންގައިފިނަމަ ހާޒިރުވުމަށްވެސް ކޯޓުން ވަނީ ނިޝާން ދޫކޮށްލަމުން ޝަރުތުކޮށްފަ އެވެ.
ނިޝާން ހައްޔަރު ކޮށްފައިވަނީ، ޔޯގާ ޑޭ ހަމަނުޖެހުމާއި ގުޅުގެން އޭގެ އަނެއް ދުވަހުގެ ރޭގަނޑުގެ ވަގުތެއްގަ އެވެ.
މި މައްސަލަ އާއި ގުޅިގެން ފުލުހުން ވަނީ ގިނަ ބަޔަކު ހައްޔަރު ކޮށްފަ އެވެ. އޭގެ ތެރެއިން ބައެއް މީހުން ބަންދުން ދޫކޮށްލާފައި ވާއިރު، އަދިވެސް ބައެއް މީހުން ބަންދުގައި އެބަތިއްބެވެ.
ޔޯގާ ޑޭ ފާހަގަކުރުމަށް ގަލޮޅު ދަނޑުގައި ބޭއްވި ހަރަކާތް ހުއްޓުވާ ހިނގި ހަމަނުޖެހުމުގައި، އެތަނުގެ ތެރެއަށް ވަދެ ބައެއް މީހުން ވަނީ ތަނުގެ ތެރޭ ހުރި ތަކެއްޗަށް ގެއްލުންދީ، އެތަނުގައި ތިބި ފަރާތްތަކަށް ބިރު ދައްކާފަ އެވެ.
މި މައްސަލަ ފުލުހުން އިތުރަށް ތަހުގީގު ކުރަމުން ގެންދާ ކަމަށް ފުލުހުން ވަނީ ބުނެފަ އެވެ.
