އުރީދޫއިން ކުލަބް ޕްރިމިއާ ޕްރޮގްރާމް ތައާރަފް ކުރެވުނީއްސުރެ، އެކުންފުނިންދަނީ ޕްރިމިއާ ކަސްޓަމަރުންނަށް ދެވޭ ހިދުމަތް އިތުރަށް ފުރިހަމަ ކުރުމަށް ގިނަ މަސައްކަތްތަކެއް ކުރަމުންކަން ފާހަގަ ކޮށްލެވެ އެވެ.
އެކުންފުނިން މައުލޫމާތު ދޭ ގޮތުގައި ކުލަބް ޕްރިމިއާ ލައުންޖަށް ގެނެވުނު އަޕްގްރޭޑާއެކު، އުރީދޫގެ ޕްރީމިއާ ކަސްޓަމަރުންނަށް ހިތްގައިމު މާހައުލެއްގައި، އެ ކަސްޓަމަރެއްގެ ބޭނުންތަކާއި އެއްގޮތައް ހާއްސަކޮށް ފަރުމާކުރެވިފައިވާ ހިދުމަތްތަކާއެކު ހިތްހަމަޖެހޭ ހިދުމަތުގެ ތަޖުރިބާއެއް ލިބިގެންދާނެ ކަމަށެވެ.
އުރީދޫ އެކްސްޕީރިއަންސް ސެންޓަރުން ލިބޭ ހުރިހާ ހިދުމަތްތަކުގެ އިތުރުން، ކުލަބް ޕްރިމިއާ ލައުންޖުން އިތުރު ތަޖުރިބާތަކެއް ކުރެވިގެންދާނެ ކަމަށާއި އެގޮތުން ސްމާޓް އެކްސެސް މެދުވެރިކޮށް، މެމްބާޝިޕް ކާޑު ބޭނުންކޮށްގެން ކުލަބް ޕްރިމިއާ ލައުންޖަށް ވަދެވޭނެ ކަމަށް އެކުންފުނިން ވަނީ ބުނެފަ އެވެ. އަދި ލައުންޖަށް ވަނުމާއި އެކު، ވަރަށް ހިތްގައިމު މާހައުލެއްގައި، އުރީދޫގެ ޕްރީމިއަމް ކަސްޓަމަރުންނަށް ބޭނުންވާ ހިދުމަތް ފަސޭހަކަމާއި އެކު ފޯރުކޮށްދެވޭނެ ކަމަށާއި ހަމައެއާއި އެކު، ޑިޖިޓަލް ފޯމުތައް މެދުވެރިކޮށް، އުރީދޫގެ ކޮންމެ ހިދުމަތެއްވެސް ފަސޭހަކަމާއި އެކު ހިޔާރު ކުރެއްވޭނެ ކަމަށް އުރީދޫއިން ބުންނެވެ.
މިއަދު ހުޅުވިގެން ދިޔަ އެކުންފުނީގެ ޕްރިމިއާ ލައުންޖު ރަސްމީކޮށް ހުޅުއްވައި ދެއްވީ، އެންވާރަމަންޓު މިނިސްޓަރު އައިމިނަތު ޝައުނާ އެވެ.
މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ޝައުނާ ވަނީ، އުރީދޫ ކުލަބް ޕްރިމިއާ ކަސްޓަމަރުންނަށް ހާއްސް ލައުންޖް އަޕްގްރޭޑްކޮށް ރަސްމީކޮށް ހުޅުވުމުން އުރީދޫ ޓީމަށް ވަރަށް ހޫނު މަރުހަބާއެއް ދަންނަވާފަ އެވެ. އެގޮތުން މި ލައުންޖުގެ ހިތްގައިމު މާހައުލާއި އަދި ހިދުމަތްތަކުގެ ސަބަބުން އުރީދޫގެ ޕްރިމިއަމް ކަސްޓަމަރުންގެ ތަޖުރިބާއަށް ވަރަށް ބޮޑު ކުރިއެރުމެއް ލިބިގެންދާނެކަމުގެ ޔަގީންކަން މިނިސްޓަރު ވަނީ ދެއްވަވާފަ އެވެ.
މީގެ އިތުރުން ރަސްމިއްޔާތުގައި ވާހަކަފުޅު ދައްކަވަމުން އުރީދޫ މޯލްޑިވްސްގެ މެނޭޖިން ޑިރެކްޓާ އަދި ސީއީއޯ ވިދާޅުވީ، އެކުންފުނީގެ އާ ބްރޭންޑް ކެމްޕޭން، "އަޕްގްރޭޑް ޔޯ ވޯލްޑް" އިން ރަމްޒުކޮށްދެނީ ރައްޔިތުންގެ ދިރިއުޅުން މުއްސަނދިކުރުމަށް އެކުންފުނިން ދޭ ހާއްސަ އަހައްމިއްޔަތުކަން ކަމަށާއި، މި ވައުދާ އެއްގޮތަށް، އެކުންފުނިން ޕްރިމިއަމް ކަސްޓަމަރުންނަށް ހާއްސަކޮށްގެން އަޕްގްރޭޑް ކޮށްފައިވާ ކުލަބް ޕްރިމިއާ ލައުންޖް ރަސްމީކޮށް ހުޅުވާކަމީ ލިބޭ ވަރަށް ބޮޑު އުފަލެއް ކަމަށެވެ.
ކުލަބް ޕްރިމިއާ ހިދުމަތް އުރީދޫއިން ތައާރަފްކުރީއްސުރެ، މި ހިދުމަތް ފުޅާކޮށް ގިނަ ފައިދާތަކެއް ކަސްޓަމަރުންނަށް ފޯރުކޮށްދިނުމަށް ގިނަ މަސައްކަތްތަކެއް އަބަދުވެސް އެކުންފުނިން ދަނީ ކުރަމުންނެވެ. އެގޮތުން ފަހުގެ އައު ބްރޭންޑްތަކާއި ޕާޓްނާވެ ހާއްސަ ޑިސްކައުންޓްތައް ފޯރުކޮށްދެ އެވެ.
