އެމައްސަލާގައި ތުލުސްދޫ ކައުންސިލު 45،000 ރުފިޔާއިން ޖޫރިމަނާކުރުމާއިއެކު، އެ ފައިސާ 30 ދުވަހުގެ ތެރޭގައި އެ އެޖެންސީއަށް ދެއްކުމަށާއި، 30 ދުވަހުގެ ތެރޭގައި ރަށު ފެންވަރުގައި ކުނި މެނޭޖުކުރުމުގެ ޕްލޭނެއް ތައްޔާރުކޮށް އެ އެޖެންސީއަށް ހުށަހެޅުމަށްވެސް އީޕީއޭއިން ވަނީ، އިއްޔެ ކައުންސިލަށް އަންގާފަ އެވެ.
އަދި ކުނިމެނޭޖުކުރުމުގެ ގަވާއިދާއި ހިލާފަށް، ތުލުސްދޫގެ ކުނިއަޅާ ޑަސްބިންތަކުގައިވާ ކުނިތައް މޫދަށް އެޅުން ވަގުތުން ހުއްޓާލުމާއިއެކު، ތިމާވެށި ރައްކާތެރިކުރުމަށް ހަދާފައިވާ ގަވާއިދުތަކަށް ބޯލަބެމަށްވެސް އެ ކައުންސިލަށް ވަނީ އަންގާފަ އެވެ.
ނަމަވެސް އެ ފައިސާ ދައްކަންޖެހޭ ކަމަށް ކައުންސިލުން ގަބޫލުނުކުރާ ސަބަބާއި، މައްސަލައިގެ ތަފްސީލު ހާމަކުރުމަށް އެކައުންސިލުން މިއަދު ނެރުނު ބަޔާނުގައި ބުނެފައިވަނީ، ކައުންސިލުން ހިލާފުވީކަމަށް އީޕީއޭއިން ބުނި، ކުނި މެނޭޖްކުރުމުގެ ގަވައިދަކީ ކައުންސިލުން ހަދާފައިވާ އަދި އެއްވެސް އިރެއްގައި އަމަލުކުރަމުން އަންނަ ގަވައިދެއް ނޫންކަމަށެވެ.
އެކައުންސިލުން ބުނީ ކުނިމެނޭޖްކުރުމުގެ ގަވާއިދާ ހިލާފުކަމެއް ހިނގާނަމަ ތަންފީޒީ އިދާރާއިން އެކަން ބަލައި ކުނި މެނޭޖުކުރާ ފަރާތަށް ރިޕޯޓެއް ހުށައަޅަންވާނެކަމަށް ބުނެފައިވީނަމަވެސް ޖޫރިމަނާކުރިއިރު، އެ ކައުންސިލަށް އެފަދަ ރިޕޯޓެއް ލިބިފައި ނުވާކަމަށެވެ.
ކައުންސިލުން ފާހަގަކޮށްފައިވާ ޝަކުވާތައް
- 2021 ވަނަ އަހަރު އެންވަޔަރަމަންޓް މިނިސްޓްރީއާއިއެކު ސޮއިކުރެވުނު ކުނި މެނޭޖްކުރުމުގެ އެއްބަސްވުމުގެ ދަށުން، ރަށުގައި ގާއިމުކުރަން އޮތް ވޭސްޓް މެނޭޖްމަންޓް ސެންޓަރުގެ އެއްވެސް މަސައްކަތް މިހާތަނަށް ކޮށްފައި ނުވުން
- ކުނިމެނޭޖް ކުރުމުގެ މަސައްކަތް ކުރިއަށް ނުދާތީ ތަކުރާރުކޮށް މިނިސްޓްރީގައި އެދުނު ނަމަވެސް އެއިދާރާއިން އެކަމަށް އިޖާބަ ދީފައި ނުވުން
ތުލުސްދޫ ކައުންސިލުން ބުނީ، މިނިސްޓްރީންނާއި ދައުލަތުން ކުރަންޖެހޭ ކަންކަން ލަސްވުމުން، ކައުންސިލުގެ ބަޖެޓުން އެމަސައްކަތްތައް ކުރުމަށް މިހާރު އެކައުންސިލުގެ ބައްދަލުވުމުން ފާސްކޮށް، އެމަސައްކަތްތައް ދަނީ ކުރަމުން ކަމަށެވެ.
އާބާދީގައި 1,483 މީހުން އުޅޭ، 36.8 ހެކްޓަރުގެ ތުލުސްދޫއަކީ ލޯކަލް ޓޫރިޒަމަށް މަޝްހޫރު ރަށެކެވެ. ލޯކަލް ޓްއަރިޒަމުގައި ބޮޑު މަގުބޫލުކަމެއް ހޯދަމުން އަންނަ މިރަށުގައި ގޭގެއިން އުކާލާ ކުދިކުނިވެސް މޫދަށް އަޅަމުންދާ މައްސަލަ ބޮޑެވެ.
މޫދަށް ކުނިއަޅަމުންދާ މައްސަލާގައި ކައުންސިލު ޖޫރިމަނާކޮށްފައިވާއިރު، ގްރޭޓަ މާލެ ރީޖަން ގައި ކުނި މެނޭޖް ކުރުމަށް، އެޑީބީ އަދި އެހެނިހެން ބައިނަލްއަގްވާމީ އެހީދޭ ޖަމިއްޔާތަކާއި، ދިވެހި ސަރުކާރު ގުޅިގެން ކުރިއަށްދާ ކުނި މެނޭޖުކުރުމުގެ މަޝްރޫއެއް ކުރިއަށް އެބަދެ އެވެ. ޑިޒައިން އެވޯޑު މަރުހަލާގައި އޮތް މި މަޝްރޫއުގެ ބަޖެޓް ފާސްކޮށްފައިވާއިރު، 10 މިލިއަން ރުފިޔާ އުނިކޮށްފައިވާތީވެ، ދަތިތަކަކާއި ކުރިމަތި ވެދާނެ ކަމަށް ވަނީ ލަފާކުރެވިފަ އެވެ. އަދި ޑަމްޕްސައިޓް އިކުއުޕްމަންޓް ރީބިޑިންނަށް ދާންޖެހުމުން، ތިން މަހުން ލަސްވެގެންދާނެ ކަމަށް ވެސް ވަނީ ލަފާކޮށްފަ އެވެ.
މިދިޔަ ޖޫން މަހުގެ 25 ވަނަ ދުވަހު ރައީސް އިބްރާހިމް މުހައްމަދު ސޯލިހް އާއިއެކު ރައީސް އޮފީހުގައި ތުލުސްދޫ ކައުންސިލުން ބޭއްވި ބައްދަލުވުމުގައި ކައުންސިލަރުން ވަނީ ކުނި ގޮނޑު އެހެން ސަރަހައްދަކަށް ބަދަލުކުރުމުގެ މަޝްރޫއާއި، ގިރާ ސަރަހައްދު ހިމާޔަތްކުރުމުގެ މަޝްރޫއުފަދަ ބަޖެޓުކޮށްފައިވާ އެހެން މަޝްރޫއުތައްވެސް ލަސްވަމުންދާ މައްސަލައިގެ ކަންބޮޑުވުން ހިއްސާކުރައްވާފަ އެވެ.
