ކަސްޓަމް އޮފިސަރެއްގެ މަގާމުގައި ދެހާސް ފަސްވަނަ އަހަރުން ފެށިގެން ވަޒީފާ އަދާކުރަމުން އައި މި ކަސްޓަމް އޮފިސަރު މަގާމުން ވަކިކޮށްފައިވަނީ ދެހާސް ވިހި ވަނަ އަހަރުގެ ތެރޭގައި އޭނާގެ މައްޗަށް ކުރެވުނު އެއް ޖިއްސުން ގުޅުން ހިންގި މައްސަލައެއް ތަހުގީގު ކުރުމަށް ފަހު އެވެ. މި މައްސަލައިގައި ކަސްޓަމް އޮފިސަރު މަގާމުން ވަކިކޮށްފައިވާއިރު، ކަސްޓަމް އޮފިސަރާ ދެކޮޅަށް ޖިނާއީ ތަހުގީގެއް ކުރެވި އެ މައްސަލަވެސް ކްރިމިނަލް ކޯޓުގައި އަންނަނީ ހިނގަމުންނެވެ.
އެ މައްސަލައިގައި އޭނާ ވަޒީފާއިން ވަކިކުރުމުން އޭނާގެ ފަރާތުން ވަޒީފާއާ ބެހޭ ޓްރައިބިއުނަލަށް މައްސަލަ ހުށަހެޅުމުން މި އަހަރުގެ ޖޫން މަހު ޓްރައިބިއުނަލުން ނިންމާފައިވަނީ އޭނާ މަގާމުން ވަކިކުރުމުގައި މައްސަލައެއް ނެތް ކަމަށެވެ. އެހެންނަމަވެސް ވަޒީފާއިން ވަކިކުރުމުގައި ފުރިހަމަ ކުރަން ޖެހޭ އިޖުރާއީ އަދުލުވެރިކަން ގާއިމްކޮށްފައިނުވާތީ އޭނާއަށް ސާޅީސް ހަތް ހާސް ހަތް ސަތޭކަ ފަސްދޮޅަށް ރުފިޔާގެ ބަދަލެއް ނަގައިދިނުމަށް ކަސްޓަމްގެ މައްޗަށް އަމުރުކޮށްފައިވެއެވެ. ކަސްޓަމް އޮފިސަރު ދިވެހިރާއްޖޭގެ ހައިކޯޓުގައި އިސްތިއުނާފުކޮށްފައިވަނީ މި މައްސަލައެވެ. މި މައްސަލަ ހައިކޯޓަށް ހުށަހަޅާފައިވަނީ މިދިޔަ އާދިއްތަ ދުވަހުއެވެ. މި މައްސަލަ ހައިކޯޓަށް ބަލައިގަތުމާމެދު އަދި އެ ކޯޓުން ވަކިގޮތެއް ނުނިންމައެވެ.
އެއް ޖިއްސުން ގުޅުން ހިންގި މައްސަލައެއްގައި ކަސްޓަމް އޮފިސަރަކު މަގާމުން ވަކިކުރުމުން އެ މައްސަލަ ހިފައިގެން އޭނާ ހައިކޯޓަށް ދިޔައިރު، އެއް ޖިއްސުން ގުޅުން ހިންގުމުގެ މައްސަލަ މި ފަހުންވަނީ އާއްމު ވެފައެވެ. މިކަމާ އެތައް ބަޔަކު އަންނަނީ ކަންބޮޑުވުން ފާޅުކުރަމުންނެވެ.
