އެމްޑީޕީގެ ކޮންގްރެސް ފެށުން ފަސްކޮށްދިނުމަށް އެދި މެދުހެންވޭރު ދާއިރާގެ އެމްޑީޕީ މަޖިލިސް މެމްބަރު އަލީ އާޒިމް ފޮނުވާފައިވާ ސިޓީއެއްގައި ބުނެފައިވަނީ އެ ގޮފިތަކުގެ މަންދޫބުންގެ ގާނޫނީ ހައިސިއްޔަތާއި މެދު އެޕާޓީގެ ގިނަ މެމްބަރުންގެ މެދުގައި ކަންބޮޑުވުން އުފެދިފައިވާ ކަމަށެވެ.
އެ ސީޓީގައި ބުނެފައިވަނީ، ގޮފިތަކުގެ ހިންގާ ކޮމެޓީ އެކުލަވާލަންޖެހެނީ ގޮފި ގަވާއިދުގައި ކަނޑައެޅިފައިވާ އުސޫލުތަކާއި ގަވާއިދުތަކުގެ ތެރެއިން އިންތިހާބެއް ބާއްވައިގެން ކަމަށްވާއިރު، ކޮންގްރެސްއަށް ނޮމިނޭޓުކޮށްފައިވާ ގިނަ މަންދޫބުންނަކީ އެ ގަވާއިދާއި އެއްގޮތަށް އައްޔަނުވެފައިވާ މަންދޫބުން ނޫންކަމަށް ސިޓީގައި ވެއެވެ.
މިކަމާއި ގުޅިގެން އެމްޑީޕީގެ ޗެއާޕާސަން ފައްޔާޒް ވިދާޅުވީ، އެޕާޓީގެ ކޮންގްރެސް އާއި ގުޅިގެން ބައެއް ފަރާތްތަކުން ޝަކުވާ ހުށަހަޅާފައިވާ ކަމަށާއި، އެކަމާއި ގުޅިގެން ޕާޓީގެ ގަވައިދުގެ ތެރެއިން ބަލަންޖެހޭ ކަންކަން ބެލުމަށްފަހު އަޅަންޖެހޭ ފިޔަވަޅުތައް އަޅާނެ ކަމަށެވެ.
އަދި ކޮންގްރެސް ފަސްކޮށްދޭން އެދި ސިޓީއެއް ފޮނުވާފައި ވީނަމަވެސް ކޮންގްރެސް ފެށުން ފަސްކުރަންޖެހޭ ސަބަބެއް ނެތް ކަމަށް ފައްޔާޒް ވަނީ ވިދާޅުވެފަ އެވެ، އަދި ކޮންގްރެސް ފަސްކުރުމުގެ ބާރު ޗެއާޕާސަނަށް ނޯންނާނެ ކަމަށާއި އެއީ އެމްޑީޕީގެ ގައުމީ މަޖިލީހަށް އޮންނަ ބާރެއް ކަމަށް ވެސް ފައްޔާޒު ވިދާޅުވި އެވެ.
މީގެ އިތުރުން ފައްޔާޒް ވިދާޅުވީ އެމްޑީޕީއިން މީގެ ކުރިން ބޭއްވި ކޮންގްރެސް ތަކާއި މި ކޮންގްރެސް ތަފާތު ވާނެ ކަމަށާއި، މި ކޮންގްރެސް އަކީ ކުރީގެ ކޮންގްރެސް ތަކާއި އަޅާބަލާއިރު މާ ބޮޑަށްވެސް ދެ ފުށް ފެންނާނެ ކޮންގްރެސް އެއް ކަމަށެވެ.
