އެމަނިކުފާނު މިހެން ވިދާޅުވެފައި މިވަނީ، އެމްޑީޕީގެ ކޮންގްރެސްގައި ހެރިޓޭޖް މިނިސްޓްރީގެ ސްޓޭޓް މިނިސްޓަރު މުހައްމަދު ތޯރިގް ވާހަކަ ދައްކަވަމުން މިނިސްޓަރު ޔުމްނާ މައުމޫނަށް ތައުރީފް ކުރެއްވުމާ ގުޅިގެންނެވެ. ތޯރިގު ވަނީ، ޔުމްނާ މައުމޫން އެމްޑީޕީގެ ކޮންގްރެސްގެ ބައިވެރިންނަށް ހެޔޮ އެދުންތައް ފޮނުއްވާފައި ވާކަމަށް ވެސް ވިދާޅުވެފަ އެވެ.
ތޯރިގުގެ ވާހަކަ އާ ގުޅިގެން ރައީސް ނަޝީދު ވިދާޅުވީ، މި ކޮންގްރެސް ގައި އެހެން ސިޔާސީ ޕާޓީތަކުގެ ވާހަކަ ދެއްކުމަކީ ރަނގަޅު ކަމެއް ނޫން ކަމަށާއި އެމްޑީޕީއަކީ ވާދަވެރި ސިޔާސީ ޕާޓީއެއް ކަމަށާއި، އެހެން ޕާޓީތަކުގެ ވަޒީރުންނާއި ފަލްސަފާއެއް ބޭނުން ނުވާ ކަމަށެވެ.
މީގެ އިތުރުން ރައީސް ނަޝީދު ވިދާޅުވީ، އެމްޑީޕީގެ ކޮންގްރެސްގައި އެހެން ސިޔާސީ ޕާޓިތަކުގެ ވަޒީރުން އިސްތިހާރު ކުރުމުގެ ބޭނުމެއް ނެތް ކަމަށެވެ.
އެމްޑީޕީގެ ކޮންގްރެސްއަށް ރައީސް ނަޝީދު ވަނީ ބަރުލަމާނީ ނިޒާމީ ގަރާރެއް ހުށަހަޅުއްވައިފަ އެވެ. ނަމަވެސް މި ކޮންގްރެސްގައި އެ ގަރާރަށް ވޯޓަށް އެހުމުން ނުކުންނާނެ ނަތީޖާ އެނގިވަޑައިގަންނަވާ ކަމަށް ވެސް އެ މަނިކުފާނު ވިދާޅުވެފައިވެ އެވެ.
