މި މައްސަލާގައި ކަންބޮޑުވުން ފާޅުކޮށް އެޖަމިއްޔާއިން "ސީއެންއެމް" އަށް ބުނީ، ވިލިމާލޭގެ އިރުމަތީ ފަރަށް "ތިލަމާލެ ބްރިޖް" ކޮންޓްރެކްޓަރުން ގެންގުޅުނު ޕްލެޓްފޯމެއް އެރިތާ މިއަދަށް އަށް ދުވަސްވެފައިވާ ކަމަށެވެ.
އަދި އެ ޕްލެޓުފޯމު ރާޅާއިއެކު ވިލިމާލޭގެ ފުއްޓަރުފަރާތު ފަރުގައި ޖެހޭ އަޑު އިވޭކަން ފާހަގަކޮށް އެ ޖަމިއްޔާއިން ބުނީ، އެ ޕްލެޓުފޯމު ފަރުގައި ޖެހުމުން އަރާ ލޮޅުން ރަަށަށް ވެސް އިހުސާސްކުރެވެމުންދާ ކަމަށެވެ.
އެ ޖަމިއްޔާއިން ބުނިގޮތުން، އެ ޕްލެޓުފޯމު ފަރަށް އަރާފައި އޮންނަތާ އަށް ދުވަސްވީއިރުވެސް، އަދިވެސް އެތަނުން އެ ޕްލެޓުފޯމު ނެނގޭގޮތެއް ނުވެ އެވެ. އަދި އެކަމަށްޓަކައި އެކަށީގެންވާ މަސައްކަތްތަކެއްވެސް އެއްވެސް އިދާރާއަކުން ނުކުރާ ކަމަށް އެޖަމީޔާއިން ގަބޫލުކުރެއެވެ.
އެ ޖަމިއްޔާއިން ގަބޫލުކުރަނީ އެވަރުގެ ބޮޑު މަޝްރޫއުއެއް ހިންގަމުންދާއިރު، ދިމާވެދާނެ އެފަދަ ކަމުން ރައްކާތެރިވުމުގެ ނުވަތަ އެފަދަ ކަމެއް ދިމާވެއްޖެނަމަ ހައްލުކުރެވޭނެވަރުގެ ސާމާނާއި، އާލަތްތައް އެފަރާތްތަކުގެ އަތުގައި ހުންނަންވާނެ ކަމަށެވެ.
ވިލިމާލެ ފަރަށް އުރުނު ބްރިޖް ޕްލެޓުފޯމް----ފޮޓޯ:ދައުރު
ވިލިމާލެއަށް ލިބެމުންދާ ގެއްލުންތައް ކުޑަކުރުމަށް ވީހާވެސް އަވަހަށް އެތަނުން ޕްލެޓުފޯމު ނެނގުމަކީ އެޖައްމިޔާގެ އިތުރުން ވިލިމާލެ ރައްޔިތުންވެސް އެދޭގޮތް ކަމަށް ސޭވް ދަ ބީޗުން ބުންޏެވެ.
ތިލަމާލެ ބްރިޖު މަސައްކަތައް ވިލިމާލެ އިރުމަތީފަރާތު ފަރާއި ދިމާލުގައި ގާއިމުކޮށްފައިވާ އެ ބްރިޖު ޕްލެޓުފޯމް ހައްޔަރުން ނެއްޓި ވިލިމާލެ އިރުމަތީ ފަރަށް އުރިފައިވަނީ މިމަހުގެ 16 ވަނަ ދުވަހު އެވެ.
ނަމަވެސް އެ ޕްލެޓުފޯމު އެތަނުން ނުނަގާ އޮންނަ މައްސަލާގައި މާލޭ ސިޓީ ކައުންސިލުންވެސް މީގެ ކުރިން ވަނީ ކަންބޮޑުވުން ފާޅުކޮށްފަ އެވެ. ކައުންސިލުން ނެރުނު ބަޔާނުގައި ބުނެފައިވަނީ، ވިލިމާލެ ފަރަކީ މާލޭ ސަރަހަައްދުގައި ހަލާކުނުވެ އޮތް ހަމައެކަނި ފަރު ކަމަށެވެ. އަދި ބްރިޖު މަޝްރޫއުގެ ސަބަބުން އެ ފަރަށް މިހާރުވެސް ނޭދެވޭ އަސަރު ފޯރަމުންދާ ކަމަށެވެ.
