ކުއްލި ގޮތަކަށް ރޭ ނިޔާވީ، ތ. ތިމަރަފުށީ ކަށިމާގެ، އަހްމަދު ހުސާންއެވެ. ހުސާންގެ އުމުރުން އެންމެ 29 އަހަރެވެ. މައުލޫމާތު ލިބިފައިވާ ގޮތުގައި އޭނާ ނިޔާވީ މެޔަށް ތަދެއް އަރައިގެން ވޭމަންޑޫ ހޮސްޕިޓަލުގައި ފަރުވާ ދެމުން ދަނިކޮށް ރޭގެ ވަގުތެއްގައެވެ.
އަހްމަދު ހުސާންއަކީ، މައުލޫމާތު ލިބިފައިވާ ގޮތުގައި ތިމަރަފުށި ކައުންސިލް އިދާރާގެ މުވައްޒަފެކެވެ. އުމުރުން އެންމެ 29 އަހަރުގައި ހުސާން ނިޔާވިއިރު، އޭނާއަކީ އަދި މީހަކާވެސް ނީނދެ ހުރި ޒުވާނެއް ކަމަށް މައުލޫމާތު ލިބިފައިވެއެވެ.
ތިމަރަފުށިން ވާހަކަ ދެއްކި ހުސާނުގެ ގާތް ރައްޓެއްސަކު ކިޔައިދިން ގޮތުގައި ތިމަރަފުށީ ހުސާނަކީ ޒުވާނުންނާއި ގާތް ގުޅުމެއް އޮންނަ، ގުޅިގެން މަސައްކަތްކުރާ ހީވާގި ޒުވާނެކެވެ.
އުމުރުން އެންމެ 29 އަހަރުގެ ޒުވާނަކު ރޭ ކުއްލި ގޮތަކަށް ނިޔާވިއިރު، މި ފަހުން މި ފަދަ މަރުތައް ކޮންމެވެސް މިންވަރަކަށް ގިނަވެފައިވާކަން ފާހަގަ ކުރެވެއެވެ. މީގެ ދިހަވަރަކަށް ދުވަސް ކުރިން އުނގޫފާރު ފުޓްބޯޅަ ޓީމުގެ 25 އަހަރުގެ ޒުވާނަކުވެސްވަނީ ނިޔާވެފައެވެ. އަދި އޭގެ ކުޑަދުވަސްކޮޅެއް ކުރިން އަރިއަތޮޅުގައި ވޮލީ ކުޅެން ހުރި ޒުވާނަކުވެސްވަނީ ކުއްލި ގޮތަކަށް ނިޔާވެފައެވެ.
ރޭ ނިޔާވި ހުސާންގެ ޖަނާޒާ މިއަދު ތިމަރަފުށީގައި އޮންނާނެއެވެ. މި ހިތާމަވެރި ވަގުތު ސީއެންއެމް ނިވްސް ޓީމުގެ ފަރާތުން ހުސާންގެ އާއިލާއާއި ރައްޓެހިންނަށް ތައުޒިޔާ ދަންނަވަމެވެ.
