"ސެލްފް އެލެވޭޓިން ޕްލެޓްފޯމް" ވިލިމާލޭ ފަރަށް އެރީ މީގެ ދެ ހަފްތާ ވަރު ކުރިންނެވެ. އެ ޕްލެޓްފޯމް ފަރަށް އެރީ، އެންކަރަށް ދިމާވި ޓެކްނިކަލް މައްސަލަ އަކާއި ގުޅިގެން ކަމަށް އެ ކުންފުންޏާއި ހަވާލާދީ ޕްލޭނިން މިނިސްޓްރީން ވަނީ މީގެ ކުރިން ބުނެފަ އެވެ.
އެފްކޮން އިން ވަނީ، ޕްލެޓްފޯމް ފަރަށް އެރި ސަރަހައްދު ސާފުކޮށް އެ މަސައްކަތް އެއްކޮށް މީގެ ދެ ދުވަސް ކުރިން ނިންމާލާފަ އެވެ.
ސާފުކުރުމުގެ މަސައްކަތް ނިމިފައި ވާއިރު، އީޕީއޭގެ ޑިރެކްޓަރު ޖެނެރަލް އިބްރާހީމް ނައީމް މިއަދު ކުރި ފޭސްބުކް ޕޯސްޓެއްގައި ވަނީ، ފަރަށް ލިބުނު ގެއްލުންތައް ދިރާސާ ކުރުމުގެ މަސައްކަތް ފަށާފައި ވާކަމަށް ބުނެފަ އެވެ.
ފޮޓޯ: އިބްރާހީމް ނައީމް
ފަރަށް ލިބުނު ގެއްލުންތައް އެނގޭނީ، ފަރުގެ ދިރާސާ ކުރުމަށް ފަހު ކަމަށް އީޕީއޭއިން ވަނީ މީގެ ކުރިން ބުނެފަ އެވެ.
ތިލަމާލެ ބްރިޖު މަސައްކަތައް ވިލިމާލެ އިރުމަތީފަރާތު ފަރާއި ދިމާލުގައި ގާއިމުކޮށްފައިވާ އެ ބްރިޖު ޕްލެޓުފޯމް ހައްޔަރުން ނެއްޓި ވިލިމާލެ އިރުމަތީ ފަރަށް އުރިފައިވަނީ މިދިޔަ މަހުގެ 16 ވަނަ ދުވަހު އެވެ. ޕްލެޓުފޯމު އެތަނުން ނެގިފައިވަނީ އޭގެ 12 ދުވަސްވީފަހުންނެވެ.
ވިލިމާލޭގެ އިރުމަތީ ފަރަށް އަރާފައި އޮތް ތިލަމާލެ ބްރިޖް ޕްލެޓްފޯމް ރާޅާއިއެކު ވިލިމާލޭގެ ފުއްޓަރުފަރާތު ފަރުގައި ޖެހޭ އަޑާއި، އެ ޕްލެޓުފޯމު ފަރުގައި ޖެހުމުން އަރާ ލޮޅުން ރަަށަށް ވެސް އިހުސާސްކުރެވެމުންދާ ކަމުގެ ކަންބޮޑުވުންތައް ރައްޔިތުން ދިޔައީ ކުރަމުންނެވެ.
