މިނިސްޓްރީން މިގޮތަށް ބުނެފައިމިވަނީ، މިފަހުން އިންޑިއާގެ ސިޓީއެއް ކަމަށްވާ ބެންގަލޫރަށް ކުރަމުންދާ ވިއްސާރައާއި ގުޅިގެން އެތަނުގައި ދިރިއުޅެމުންދާ ދިވެހި އާއިލާތަކުގެ ހާލަތު ގާތުން ބަލަމުންދާ ކަމަށް ފޮރިން މިނިސްޓްރީން ބުނިއިރު ޕާކިސްތާންގައި ތިބި ދިވެހީންގެ ހާލަތު ބަޔާންކޮށްދީފައި ނުވާތީ އެކަމާއި ގުޅިގެން ނޫސްވެރިން ސުވާލުތައް ކުރުމުންނެވެ.

އޭގެ ދެދުވަސް ފަހުން މިއަދު މީޑިއާތަކަށް މިނިސްޓްރީން ފޮނުވި މެސެޖުގައި ބުނީ ޕާކިސްތާންގައި ތިބި އާއިލާތަކަށް ހައިކޮމިޝަނުން ވަކިވަކިން ގުޅައި ހާލަތު ބަލާފައިވާ ކަމަށެވެ. އަދި އެންމެންގެ ހާލުވެސް ރަނގަޅު ކަމަށް އާއިލާތަކުން މައުލޫމާތު ދޭކަމަށް ބުންޏެވެ.

ޕާކިސްތާނަށް ކުރި ވިއްސާރާގައި ގިނަ ބައެއްގެ ގެދޮރުވަނީ ގެއްލިފައި

މޫސުން ގޯސްވެ، ކުރި މި ވިއްސާރައަކީ 220 މިލިއަނަށް ވުރެ ގިނަ މީހުން ދިރިއުޅޭ ޕާކިސްތާނަށް މިހާތަނަށް ކުރި އެންމެގަދަ ވިއްސާރައިގެ ގޮތުގައި އެގައުމުގެ ނޫސްތަކުން ވަނީ ރިޕޯޓުކޮށްފައެވެ. މި ވިއްސާރާގައި ވެހުނު ގަދަވާރެއާއެކު ފެންބޮޑުވެ ބޮޑެތި ގެއްލުންތަކެއް ވަނީ އެ ސަރަހައްދުގައި ދިރިއުޅޭ މީހުންނަށް ލިބިފަ އެވެ.  

މި ވިއްސާރާގައި މިހާތަނަށް 1،300 އަށް ވުރެ ގިނަ މީހުން މަރުވެފައިވާއިރު، ޕާކިސްތާންގެ 160 ޑިސްޓްރިކްޓްގެ ތެރެއިން 81 ޑިސްޓްރިކްޓުގައި ފެންބޮޑުވެ މަދުވެގެން 33 މިލިއަން މީހުންގެ ގެދޮރު ގެއްލިފައިވާ ކަމަށް ލަފާކުރެވޭކަމަށް އެގައުމުން  ބުނެއެވެ. 

އެތައް ބަޔަކު ގެދޮރު ގެއްލިފައިވާއިރު، މިހާރު އޮތް ބިރުވެރިކަމަކީ ބައެއް ސަރަހައްދުތަކުގައި ބޮޑުވެފައިވާ ފެންގަނޑުތައް ބަންޑުން ވެދާނެ ކަމުގެ ބިރުވެރިކަމެވެ.