ލ. އަތޮޅުގައި މިއަދު ނިމުމު ވިއަވަތި ކޮންފަރެންސްއަށް ފަހު ނޫސްވެރިންނާ ބައްދަލު ކުރައްވާ ރައީސް ވިދާޅުވީ މާލޭގައި ހަރަކާތްތެރިވާ ގޭންގުތަކާ ދެކޮޅަށް ސިފައިންނާއި ފުލުހުން ގުޅިގެން ކުރާ މަސައްކަތުގެ ނަތީޖާ މަގުތަކުން ފެންނަ ކަމަށެވެ. ރައީސް ވިދާޅުވީ މާލޭގެ މަގުތަކުގައި އާއްމުންގެ ސަލާމަތާއި ރައްކާތެރިކަމާ ގުޅޭ މައްސަލަ އެބަހުރި ކަމަށެވެ. ނަމަވެސް، ފާއިތުވި 4-5 އަހަރާ އަޅާބަލާއިރު މަގުތަކުގެ ސަލާމަތަށް ބަދަލުތަކެއް އައިސްފައިވާ ކަމަށެވެ.
އިތުރަށް ވާހަކަ ދައްކަވަމުން ރައީސް ވިދާޅުވީ އާއްމުންގެ ގިނަ ކަންބޮޑުވުމެއް އޮތް މި މައްސަލަ ހައްލުކުރުމުގެ ފުރަތަމަ މަރުހަލާގައި، އެ ގޭންގުތައް އެއްވެ އުޅޭ މަގުތައް ސިފައިންނާއި ފުލުހުން ބެލެހެއްޓީ ކަމަށެވެ.
ގޭންގުތައް މިހާރު އޮޕަރޭޓް ކުރާ ގޮތް ބަދަލުވެފައިވާ ކަމަށް ރައީސް ވިދާޅުވިއިރު މިދިޔަ ހަފްތާ ބަންދުގައި ގޭންގަކުންވަނީ ފުލުހުންނަށް ހަމަލާދީފައެވެ. މި ހަމަލާތަކާ ގުޅިގެން 3 މީހަކު ހައްޔަރުކޮށްފައިވެއެވެ. ރައީސް ވިދާޅުވީ އެފަދަ ހަމަލާއެއް ކުރިމަތިވިއަސް މިހާރު އެކަންކަން މަދު ކަމަށެވެ. އަދި ކަމާގުޅޭ އިދާރާތަކުގެ އޮޕަރޭޝަން އޮތީ އެ ފަދަ ހަމަލާއަކާ ގުޅިގެން ހުއްޓާލާ ގޮތަކަށް ނޫން ކަމަށްވެސް ރައީސް ވިދާޅުވި އެވެ.
