އިބަމަ މިއީ ކޮން ބައެއް؟
އިޖުތިމާއީ ބަދަހި މަދަދުވެރިން ނުވަތަ އިބަމައަކީ އިޖުތިމާއީ ރައްކާތެރިކަމާއި އެހީތެރިކަން ބޭނުންވާ ފަރާތްތައް ދެނެގަނެ އެ ފަރާތްތަކަށް ބޭނުންނާ އެހީތެރިކަން ފޯރުކޮށްދީ އަދި އެ ފަރާތްތަކަކީ އިޖުތިމާއީ ރައްކާތެރިކަން ލިބިފައިވާ ބައެއްކަން ކަށަވަރުކުރުމަށް އަޅަން ޖެހޭ ރައްކާތެރިކަމުގެ ފިޔަވަޅުތައް އެޅުމަށާއި ދުޅަހެޔޮ މުޖުތަމައައެއް ބިނާ ކުރުމަށް ވަށައިޖެހޭ ގޮތެއްގައި މަސައްކަތް ކުރާ ޓީމުތަކަކެވެ. މާލެ ސިޓީ ފިޔަވައި އެހެން ރަށްރަށުގައި އަދި ސިޓީތަކުގައި މި ޓީމު އެކުލަވާލެވޭނީ މިހާރު އާއްމުކޮށްފައިވާ އުސޫލުގެ ތެރެއިންނެވެ.
ކޮންމެ ރަށެއްގައި ނުވަތަ ސިޓީއެއްގައި "އިބަމަ" އެކުލަވާލުމުގެ އިދާރީ އެންމެހައި ކަންކަން ކުރާނީ މިނިސްޓްރީގެ ލަފަޔާއެކު ސިޓީ ނުވަތަ ރަށު ކައުންސިލުންނެވެ. މިގޮތުން، "އިބަމަ" އެކުލަވާލާނީ އެ ރަށެއް ނުވަތަ ސިޓީއެއްގެ އާބާދީއަށާއި މީހުން ދިރިއުޅޭ ސަރަހައްދަށް ބަލައި އެ ނިސްބަތުން އެ ރަށެއް ނުވަތަ ސިޓީއަކަށް އެންމެ އެކަށޭނެ ގޮތަށެވެ. މިހާރު އާއްމުކޮށްފައިވާ އުސޫލުގެ ދަށުން ގިނަ ވެގެން 3 މަސް ދުވަހުގެ ތެރޭގައި ކޮންމެ ރަށެއްގައި ނުވަތަ ކޮންމެ ސިޓީއެއްގައި "އިބަމަ" އެކުލަވާލަން ޖެހެއެވެ.
މިއަހަރުގެ ކުރީކޮޅު "އިބަމަ" ރަސްމީކޮށް އިފްތިތާހުކޮށްފައިވާއިރު، އިބަމަގެ އަމާޒަކީ ކަމެއް ކުރިމަތި ވުމުގެ ކުރިން ރައްކާތެރިވުމުގެ ފިޔަވަޅު އެޅުން ކަމަށް ޖެންޑާ މިނިސްޓަރު އައިޝަތު މުހައްމަދު ދީދީވަނީ ވިދާޅުވެފައެވެ. އިބަމަ އުސޫލު އާއްމު ކުރިއިރު ގިނަ ރަށްތަކެއްގައިވަނީ އިބަމަގެ ޓްރެއިނިން ކުރިއަށް ގެންގޮސްފައެވެ.
