އެ އިސްލާހުގައި ވަނީ، މަޖިލީހަށް އިންތިހާބުކުރާ މެމްބަރުންގެ އަދަދަކީ 87 ކަމުގައި ގާނޫނު އަސާސީގައި ލިޔެފައި ބޭއްވުމަށެވެ. އެގޮތުން އިދާރީ ދާއިރާތަކުގެ ތެރޭގައި 87 ދާއިރާ ހިމެނުމަށްފަހު، ކޮންމެ ދާއިރާއަކުން އެއް މެމްބަރަކު އިންތިހާބު ކުރަންޖެހޭގޮތަށް ގާނޫނު އަސާސީ އިސްލާހު ކުރަން ގާސިމް ހުށަހަޅުއްވާފައި ވެއެވެ.
ސަބަބެއްކަމުގައި ވިދާޅުވެފައިވަނީ، މިހާރު ގާނޫނު އަސާސީގައި އޮންނަގޮތުން ކޮންމެ ފަސް އަހަރަކުން މަޖިލީހަށް މެމްބަރުން އިތުރުވަމުން ދިއުމުންނާއި، މިއަދަދު ހުއްޓުމެއްނެތި އިތުރުވަމުންދާނަމަ ރާއްޖެފަދަ ކުޑަ ގާނޫނު ހަދާ މަޖިލީހަށް ބޭނުންވާ ވަރަށްވުރެ ގިނަ މެމްބަރުން އިންތިހާބު ކުރަންޖެހެދާނެތީ އެވެ.
މި އިސްލާހަށް މިހާރު ކުރިއަށްދާ ބަހުސްގައި މިހާތަނަށް ބަހުސްކުރެއްވި 18 މެމްބަރުންގެ ތެރެއިން 16 މެމްބަރުން ވިދާޅުވީ އެއިސްލާހުގެ މައިގަނޑު މަހްފޫމަށް ތާއިދުކުރެއްވި ނަމަވެސް މުޅި ބިލަށް އެއްބަސް ނުވެވޭ ކަމަށެވެ.
އެގޮތުން ސަރުކާރަށް ނިސްބަތްވާ އެތައް މެމްބަރުންނެއް ވެސް ވިދާޅުވީ، އަދަދު ހިފެހެއްޓުމަށް ތާއިދުކުރާކަމަށާއި ނަމަވެސް އެއީ 87 ތޯ ނިންމުމަށް ފުޅާ ދާއިރާއެއްގެ މަޝްވަރާތަކެއް ފުރަތަމަ ކުރަން ޖެހޭކަމަށް ގަބޫލުކުރައްވާ ކަމަށެވެ.
އަސްލަމްގެ އަދަދު ސުވާލު ދެން ބަހުސްކުރެއްވި ކޮންމެ މެމްބަރަކު ކުރެއްވި އެވެ.
ނިޔާޒު އެދިވަޑައިގަތީ، މަޝްވަރާގެ ތެރެއިން ގިނަ ރައްޔިތުންގެ އަޑު އިއްވޭނެފަދަ ގޮތަކަށް މެމްބަރުންގެ އަދަދު ހިފެހެއްޓުމަށް މަސައްކަތްކުރުމަށެވެ.
އޭގެފަހުން ވާހަކަދެއްކެވި ހަނިމާދޫ ދާއިރާގެ މެމްބަރު އަބްދުލްގަފޫރް މޫސާވެސް ކުރެއްވީ ހަމަ އެ ސުވާލެވެ.
މެމްބަރު އަބްދުލްގަފޫރް މޫސާ ވިދާޅުވީ، މެމްބަރުންގެ އަދަދު އިތުރުވާންޖެހޭނީ ހުދޫދެއްގެ ތެރެއިންކަން ގަބޫލުކުރައްވާ ކަމަށެވެ. އެކަމަކު އެ އަދަދު ހިފަހައްޓާ ”ތަޅުއަޅުވާނީ“ ކިހާވަރެއްގައިތޯ އެއީ މަޝްވަރާކޮށްގެން ނިންމަންޖެހޭ ނިންމެއްކަން އޭނާ ވެސް ފާހަގަކުރެއްވި އެވެ.
މީގެ ފަހުން ވާހަކަދެއްކެވި މެމްބަރުން ވެސް ފާހަގަކުރެއްވީ ހަމަ އެއްވާހަކަތަކެވެ. އަދަދު ހިފަހައްޓަންޖެހޭ ކަމަށެވެ. އެކަމަކު އެ އަދަދާއިމެދު އަދިވެސް މަޝްވަރާކުރަން ބޭނުންވާ ކަމަށެވެ.
ގާނޫނު އަސާސީ 2008 ވަނަ އަހަރުގެ އޮގަސްޓު ހަތްވަނަ ދުވަހު އިސްލާހުކުރެވުނު ފަހުން މިހާތަނަށް ބާއްވާފައިވަނީ ރައްޔިތުންގެ މަޖިލީހުގެ ތިން އިންތިހާބެވެ. އެގޮތުން 2009 ގައި ބޭއްވުނު 17 ވަނަ މަޖިލީހަށް 77 މެމްބަރުން އިންތިހާބުކުރި އިރު، 2014 ވަނަ އަހަރު ބޭއްވުނު 18 ވަނަ މަޖިލީހަށް 85 މެމްބަރުން އަދި މިހާރު ކިުރިއަށްދާ 19 ވަނަ މަޖިލީހަށް 87 މެމްބަރުން ވަނީ އިންތިހާބު ކުރެވިފަ އެވެ.