މި ގަރާރަކީ ގަލޮޅު ދެކުނު ދާއިރާގެ މެމްބަރު މީކާއިލް ނަސީމް މިދިޔަ އޮގަސްޓު މަހުގެ 29 ވަނަ ދުވަަހު އޮތް މަޖިލީހުގައި ހުށަހެޅުއްވި ގަރާރެކެވެ.

މި ގަރާރު މަޖިލީހަށް ބަލައިގަތުމަށް މިއަދުގެ ރައްޔިތުންގެ މަޖިލީހުގައި ނެގުނު ވޯޓުގައި، ގަރާރު ބަލައިގެންފައިވަނީ، ވޯޓުގައި ބައިވެރިވި 45 މެމްބަރުންގެ އަގުލަބިއްޔަތުން ނެވެ.

ގަރާރު މަޖިލީހަށް ބަލައިގަންނަން ފާސްވުމާއިއެކު ގަރާރު ދިރާސާކުރުމަށް އިޖްތިމާއީ ކޮމެޓީއަށް މިއަދު ވަނީ ފޮނުވާފައެވެ.

މީކާއިލް ހުށަހެޅި ގަރާރުގައި ބުނެފައިވަނީ، ރާއްޖޭގެ ކޮންމެ ރައްޔިތަކަށް ބޭސްފަރުވާގެ ހިދުމަތަކީ، ހިލޭ ލިބެންޖެހޭ ހިދުމަތެއް ކަމަށް ކަނޑައަޅައި، އިޖްތިމާއީ ސިއްހީ އިންޝުއަރެންސްގެ ނިޒާމެއް ގާއިމް ކޮށްފައި ވާއިރު، މި ނިޒާމުގެ ތެރެއިން ބޭސްފަރުވާގެ ބައެއް ކަންކަމަށް ފަރުވާ ނުދެވޭ ކަމީ އޮތް ވަރަށް ބޮޑު ކަންބޮޑުވުމެއް ކަމަށެވެ. 

އަދި ވަކިން ހާއްސަކޮށް ދަރިމައިވުމުގެ މައްސަލައާއި ކުރިމަތިލާންޖެހިފައިވާ ފަރާތްތަކަށް ބޭނުންވާ އެންމެ އަސާސީ ބޭސްތައްވެސް ރާއްޖެއިން ލިބެން ނުހުންނަ ކަމަށާއި، މިއީ ކަންބޮޑުވާ މައްސަލައެއް ކަމަށް އެގަރާރުގައި ވެއެވެ. 

ގަރާރުގައި ގޮވާލާފައިވަނީ، ދަރިމައިނުވުމުގެ މައްސަލައަށް ބޭނުންވާ އަސާސީ ބޭސް ރާއްޖެއިން ފަސޭހައިން ލިބޭނެ މަގު ފަހުކޮށްދީ، އެކަމަށް ބޭނުންވާ އަވަސް ހައްލު ހޯދުމަށެވެ.